黃秋生昨日到中環錄影無綫節目《燭光晚餐》，他表示在嘉賓張天愛面前怕會「唔夠料」、「唔知講咩好」，但問到對梁思浩取笑杜汶澤的新聞有何看法時，他即發揮幽默本色，令人笑到碌地。

黃秋生大讚張天愛有貴族修養，令他擔心唔夠料同對方傾偈。

黃秋生與張天愛一見面即有講有笑。

黎芷珊亦有現身中環錄影節目。

黃秋生、黎芷珊及張天愛昨日錄影《燭光晚餐》，秋生表示在張天愛的貴族修養面前，怕自己會「露底」：「我心虛，驚唔夠料同張天愛傾偈，佢係時代嘅代表，佢嘅貴族修養係呢個時代已經消失咗嘅品味。（做定功課準備？）愈備咪愈驚，我直頭係恐懼，佢文化深厚，要傾都好多嘢傾。」問到會否請契女梁洛施做嘉賓？秋生說：「唔會，啲嘉賓一早定晒，其實我同個個都多嘢講，最近淨係同一個人冇嘢傾，嗰個咪我自己囉！（點睇梁思浩話杜汶澤買棺材唔知碇？）呢個友仔都幾好笑，古靈精怪，搵佢買咪得囉！有八折！佢成日拍埋啲神神化化嘢，搵佢買有八折加化妝，仲送埋衣紙添！哈哈哈，講笑啫！」

反讚夠Man有魅力

張天愛則力讚秋生擁有她所欣賞的男人魅力，她說：「我好欣賞秋生，佢嘅男人魅力係由心而發，唔使講嘢都好有吸引力，香港好多流行偶像都好男仔，欠缺男人氣概，唔似得外國有夏理遜福，但秋生好Man，無論咩年齡、國籍都會鍾意佢！」談到繼母顏婉玉在新加坡被殺一事，她說：「我哋好多年冇見，呢件只係一件偶然嘅災難。無論生活喺邊度，都要睇前睇後，因為你唔知人哋咩背景、修養，係咪有病？就算喺香港都曾經有舞蹈家喺街被殺（指毛妹徒弟）。（去新加坡幫手處理後事？）我之前喺北京收到好多電話，我唔想因為我個名而令外界再去講呢件事，最好唔好講！」