吳彥祖（Daniel）、張家輝及導演林超賢昨宣傳英皇新片《魔警》，與觀眾互動逼爆會場！Daniel返港10日宣傳，他坦言此行最惦念是10個月大的囡囡：「佢已經單手扶嘢學行，我驚錯過重要時刻，惟有叫老婆拍片！」他又透露正於加拿大拍動作戰爭片，預計10月竣工：「佢哋用《阿凡達》技術，但進步咗10年，學到好多嘢！」

林嘉華（左起）、家輝、思漩和Daniel在活動上舉杯祝酒。

至於被指戲份不多的家輝說：「都係為件事啫！林導想做，楊生（楊受成）想開，我冇乜所謂！」他又表示早前於柏林影展已欣賞《魔》片，帶來無限驚喜，難怪他希望與林導保持合作！談到票房，他指未感壓力：「不過當然想票房長紅啦！如果成績好最希望加薪！」而同場的思漩則向林導「獻媚」，並希望獲安排機會夥同Daniel演愛情片。