日前在網上溝女惹禍的美國男星占士法蘭高（James Franco），前日在電視節目承認事件，並表示已得到教訓，但有專家仍咬實唔放，直斥占士的道歉誠意欠奉！

型男占士法蘭高日前在社交網站Instagram「勾引」英國17歲少女Lucy Clode，結果被對方Cap圖公開兩人對話，令他形象盡毀。占士為挽回面子，前日在電視節目《Live！With Kelly and Michael》接受訪問，他承認事件並非新片的宣傳伎倆，又神情緊張地說：「我本來唔想上呢個節目，覺得好尷尬，社交網有幾蠱惑，我已經做咗人辦。不幸地，我係一個公眾人物，我喺網上約人見面已經尷尬，依家仲要被人公開，變得雙倍尷尬，我用咗壞嘅判斷，我已經得到教訓。」女主持Kelly Ripa隨即大讚占士有勇氣站出來承認，還開玩笑指不會公開自己與占士之間的短訊。

左顧右盼冇誠意

不過，身體語言專家Lillian Glass卻直斥占士的道歉欠缺誠意：「佢雙眼望上望下，道歉時又唔望主持，佢只係做緊嘢去挽回聲譽，而且佢把聲得一個Tone，冇誠意！」而Lucy的84歲祖母Beryl Sussex更指占士應該被孫女的父親打手，還表示Lucy出身於互相尊重的家庭。但關係科專家Cilda Carle力撐占士，指Lucy只是想透過新聞博出位。