鄭伊健玩．認真

《事業》發緊導演夢

伊健笑看風雲亦看淡風雲，做人做事非常瀟脫，他直言「野心」一詞不適合形容自己，正如五年前重返演唱會一樣，突然玩即興純粹為一個夢，他說：「你可以話係野心，但我唔覺得係叫野心，我用另一個諗法，係有一個夢想，未必係拎啲乜嘢，可能係五年前開番演唱會，都係一個夢，因為我十幾年前就冇做唱片，歌唱事業一路停停停，之後我就夢想可以再上番台，結果咪達成咗囉！」其後，他拉埋其他古惑仔上台，齊齊開演唱會，搞得有聲有色兼座無虛席，實在是伊健意料之外的事，他笑言冇計劃勝過一切：「我哋幾個古惑仔唔係成日見，就算過年都未必去拜年，呢個模式十幾廿年都係咁，有一日突然即興話大家出嚟聚吓，就出咗嚟喇！雖然唔係成日見，但做嘢就有個默契。」

對於未圓夢，還盼葡萄成熟時，他笑言有朝一日心血來潮自然會實現：「好想做導演，其實講咗好耐，但一路拖住先，只要突然間有一下真係要做，我就會做o架喇！同埋要繼續支持香港電影，因為點都需要有人，等於家輝哥哥係其中一條柱，我哋都會慢慢成熟，仲有做多啲廣東歌，依家廣東歌愈嚟愈少，只要我哋一日係廣東歌歌手，就會繼續做多啲作品。」

《人生》求開心冇壓力

陪住不少港人成長的鄭伊健今年46歲依然型得起，他揀中新片《盜馬記》跟十幾年前合作過的梁家輝和陳慧琳（Kelly）做拍檔，理由夠晒瀟灑，他直言純粹不要壓力：「你哋唔覺得依家啲電影愈來愈趨向真實咩？太過歇斯底里，我哋人生本來都係咁啦！可唔可以輕鬆少少？其實我未入行前拍過一堆UFO電影，例如陳小春都做過《救世神棍》，後來又拍啲取材自漫畫嘅片，都係貪題材夠得意，所以今次聽到家輝哥哥同Kelly合作，一嚟覺得冇壓力，二嚟導演話套戲唔喺香港拍而喺布拉格，咁開心，咁得喇！我接！」

冇錯！伊健說話就是如此活潑又直接，怪不得外界標籤他做「大男孩」，夠貪玩、簡單、率真！造就得瀟灑個性，少不免與身邊人有關，他直言其老師、已故殿堂級歌手羅文（籮記）是影響他最深的其中一人：「籮記成日話：『得快樂時且快樂！』咪即係大家最近經常掛喺嘴邊嘅『及時行樂』囉！其實當日佢已經講緊呢樣嘢，總之喺你面前有嘢食你就食，想開心就開心，唔好諗咁多嘢，開心完先算，同埋佢話：『做嘢要認真，玩都要好認真！』我覺得都幾接近自己嘅方向。」

扭轉逆境

一個「大男孩」得到老師啟蒙，人生只求盡歡玩得就玩，伊健講得輕鬆，但到底有幾多人可以在娛樂圈大染缸入面一直簡單到尾？身為當事人的他笑言實際上自己亦變得非常複雜：「好多人都話娛樂圈好複雜，一年等如出面做嘢四年，我喺入面都做咗好多年，證明我應該好複雜，哈哈！」他認為做人最緊要「識玩」：「有啲嘢係識嘅，但唔使下下拎出嚟，例如面對好複雜嘅人你要做某啲嘢，但如果係平時唔需要嘅，好簡單都係做番自己，同埋遇到複雜嘅嘢，原來愈簡單就愈難追求，唔好成日望住擁有嘅嘢，唔拎到手嘅時候、喺過程入面已經要開始珍惜。」

因為識得玩，走到難關亦識得睇淡，縱使多年來聽得多「唓！佢好彩啫！」等流言蜚語，伊健不但不感覺到躊躇，甚至以一貫作風笑說：「係我將件事扭轉咗啫！」他說：「以前啱啱出道做唱片嗰陣，大家仲係講緊：『唉！佢好命啫！』結果我唔好嘅時候，大家冇再講呢句說話，然後發生好多事，例如唱片冇繼續出、電影票房唔係咁理想，大家就話：『鄭伊健OK啦！都係麻麻哋！』之後就咩都唔會記得，我想講逆境嘅事係發生過嘅，因為我用一個正面態度去面對，所以唔可以話係一個挫折，只係一個考驗，因為從來人唔係一定要得到啲咩，睇你點將佢化為一個經歷得到教誨。」

《家庭》戥老婆辛苦

站在高峰沒有自吹自擂，在低潮亦不自怨自艾，除了靠自己外，伊健不忘感謝家人體諒：「屋企人好簡單，有時候我拎唔到獎，佢哋話：『冇咩所謂o架！你本來都冇o架啦！已經好叻o架喇！』所以我都覺得有就梗係好，冇都冇乜嘢！」由細到大有家人支持，所以他去年迎娶「鄭太」蒙嘉慧（YoYo）後亦發揚「鄭家」精神，不時戥老婆感到辛苦，大讚老婆捱得：「YoYo係一個比較辛苦嘅人，要同一時間兼顧好多嘢同關係，例如我屋企人、佢屋企人、我哋嘅朋友等，好多時佢都會做一個中間人，通常做中間人要最大付出o架嘛！要犧牲好大，又要用好多精神，好似我咁就未必做得到，真係幾難o架！」

嗌交發洩

講還講，當兩公婆走到磨合位時，難免發生摩擦，不過「大男孩」用最直接的方法看待事件，他笑言嗌交是正常不過的事：「係發洩吓啫！嗌交冇話邊個啱定邊個錯，睇吓邊個理據好啲，一切都係生活點滴！未結婚都有爭執o架啦！冇爭執實有事，唔好諗住天下太平，其實愈係冇爭執先至係一個危機嘅開始。」當然，懂得發火亦要懂得收火，所以他直言往往不出一日便和好如初：「一日太耐喇！大家已經大個，事情唔一定要解決，慢慢改善、改良啦！畢竟『對唔住』好容易講出口，要真正處理件事先係困難嘅事。」至於幾時製造萬眾期待的「蒙麵B」，他乾脆利落地說：「順其自然啦！」

後記：大男孩心急「放學」

訪問前，小記對伊健的印象只有「型仔」及「大男孩」，直至見面當天，無意中聽到他問工作人員收得工未：「呢個訪問之後再做多單，跟住就完喇呵？」可惜當得知回覆是：「你就想！仲有3個電話訪問呀！」其眼神竟然十足小朋友心急等放學一樣，嗰一刻突然覺得：「嘩！原來鄭伊健可以好可愛！」