藝人車車（張紫櫻）的嬌小身形，經常給人柔弱易恰的印象，但原來當她跑步時，「好恰」車車即蛻變成不達標不肯停步的毅行者。車車指平日跑步除了可以鍛煉體魄，更替她鑄造了一顆向着標竿直跑的決心！

愛跑步的車車藉此改善體魄和減壓，更悟出不少人生道理。

除了跑步外，熱愛運動的車車亦曾跟譚校長學打高爾夫球。

拉筋：小腿
前後腳站立後，身體微微向下壓，雙手放在大腿位置，後腳往後拉。之後身體進一步往下壓，做出壓腿動作，前腳膝蓋成90度，後腳屈曲，維持動作約20秒，交換前後腳將整組動作重複一次。

提腿
將小步跑中的雙腳動作進一步加強，跑動時盡量將膝蓋屈曲至90度，來回跑二十步，這組動作主要針對大腿肌肉。

小步跑
手腳動作與平日跑步無異，不過大幅收窄步幅距離，來回約跑二十步已足夠。

拉筋：大腿
兩腳稍微分開，腳掌貼地，然後身體向前彎至手指掂地，維持動作20秒。

之後前後腳交叉企，身體向前彎至手指掂地，維持動作20秒。

相比起香港女士們近年流行的瑜伽或者跳舞，車車卻對跑步情有獨鍾：「有段時間，我堅持一個星期跑三、四日，因為我屋企附近有條海濱長廊，換件衫、着對鞋就可以落街跑，好方便！有朋友咁啱想Join咪約埋，冇嘅話，一個跑都得，瑜伽同跳舞，我諗好少一個人去啩？我同大部分人唔同，鍾意夜晚先出去跑步，因為我怕被太陽曬親，始終女仔曬得多易有雀斑，夜晚先出動，唔只唔驚被太陽曬親，其實一邊吹住海風、聽住音樂，一邊被四周圍啲夜景包圍跑步，都幾好Feel，朝早開工有咩壓力都可以放鬆番啲！」

出身汗助減壓

說得頭頭是道的車車又說：「我唔係嗰啲專業到要跑馬拉松嘅跑手，我只係志在做運動、出身汗，我跑步嘅目的只係想聽吓歌、望吓景，等個腦同個人有一個可以靜落嚟嘅時間，釋放工作同生活壓力。其實我讀書嗰時好少運動，我諗因為咁我至生得咁矮，其實做運動係好嘅，我未跑步之前因為心跳有啲唔正常，去咗睇醫生，醫生建議我做適量運動，我先開始養成跑步嘅習慣。」

車車指跑步不但讓她鍛煉體魄，更為她鑄造了一顆向着標竿直跑的決心：「跑步令我體會到人生同跑步其實有好多相似之處：跑步冇可能由頭到尾都用同一個速度，需要按能力同情況作出調節。人生都一樣，好多時拚盡全力衝刺咗一段路之後，就會慢番落嚟，或者當你工作上有個小收成之後，就會放個Break，再去衝下一個目標。至於點樣定跑幾遠？畀幾耐時間跑？其實同做人定目標一樣，定啲超出能力嘅目標係冇意思，反而按部就班，會更加引發到潛能。」

先熱身 免受傷

熱身經常予人枯燥乏味的感覺，但為免運動時受傷，熱身必不可少。車車分享她跑步前的幾組熱身動作：「僅供參考啦！因為我唔係諗住參加比賽，只求跑起嚟覺得舒服，如果想啲動作完美到職業運動員咁，諮詢專業教練先係最正確嘅做法！」