歌手朱紫嬈（Khloe）每次見人都化行妝打扮靚靚，早前趁有幾日假期即陪家人到陽光與海灘的泰國蘇梅島旅行，拋下歌手身份日日純情素顏示人，大玩浮潛又欣賞泰拳比賽，但見鮮血橫飛嚇到即撇！

蘇梅島水清沙幼風景勁靚，最啱朱紫嬈放假Relax。

遊鄰海地區點少得食海鮮？朱紫嬈食蟹食得相當滋味！

夕陽景色醉人，朱紫嬈點會放過影相機會？

朱紫嬈一心欣賞泰拳比賽，但被打到爆血的戰況嚇到走佬。

朱紫嬈（Khloe）自入行後忙於工作，甚少時間陪伴家人，孝順的她早前放假休息，即約父母出外「歎世界」，喜愛陽光與海灘的她特別揀選去蘇梅島遊玩：「一落飛機已經感覺到大自然嘅氣息，真係好度假Feel，好Relax，酒店又靚，簡直冇得頂呀！」

Khloe此行最開心是不用化妝，她說：「喺香港出街少少妝都會化，嚟到因為成日落水玩，所以冇理由化妝。（唔驚畀人認得？）唔驚，去旅行唔需要顧慮太多，同埋唔化妝個樣都幾清純吖其實！」

浮潛畀魚圍

她又跟家人大玩浮潛：「落水之前將啲麵包塞落個樽度，落到水之後打開樽蓋，啲魚圍晒埋嚟，好開心！」

由於當地正舉行泰拳比賽，Khloe即把握機會欣賞，不過她大叫恐怖：「真係幾得人驚，打到流晒血，流緊血都仲繼續打。」Khloe愈講愈深入：「打到個頭流血，即刻用止血粉撻住，點知又畀對手揮拳，成堆止血粉飛出觀眾席，嚇到唔敢睇即刻走！走時仲見到擂台邊有個裝滿血嘅鐵盆，應該係拳手休息時吐嘅血。」