電台主持森美昨日在節目狂寸周柏豪推出的潮服，勁彈潮服心口的「8」字設計核突兼似治喪服，當得悉品牌是好友柏豪創作時，他即急急補鑊大讚柏豪穿得好看，更火速播對方新歌及道歉：「我真係唔知！」

潮牌被踩的柏豪，大方感謝森美在電台介紹其品牌，真係好老友喎！

「口沒遮攔」的森美狂寸柏豪推出的潮服似喪服。（資料圖片）

森美昨日為節目《早霸王》開咪，見拍檔穿上柏豪推出的「8」字潮衫即一輪嘴狂插：「咁大個8字喺心口做乜？咁核突，咁大個字做乜？放個驗眼嘅『8』字喺度，潮人白內障要睇清楚啲？」並自嘲不是潮人，由於衫上左右兩邊有白間，森美說：「外套好似太公治喪團。」當拍檔表示品牌是柏豪創作，知衰的森美才說：「我真係唔知！」隨即讚柏豪打扮很潮，並播對方新歌補鑊。

唔驚「豪迷」嬲

記者就事件聯絡森美，他說：「我唔知係佢！所以無中生有作咗啲評價，其實心想着上身潮一下。」與柏豪老友鬼鬼的森美表示會與柏豪傾番：「佢一定唔介意！（驚唔驚柏豪歌迷嬲？）唔使擔心，佢啲歌迷好型同乖，係嬲只會嬲着得唔靚嗰啲人。」

而柏豪昨日在電話中表示與森美是好友：「多謝關注！本身同森美係朋友，相信佢係講笑，多謝佢喺電台介紹我品牌。」又不忘自我宣傳：「第二季嚟緊都係大『8』字。」對於有指新歌《著地》疑抄襲美國搖滾樂隊Imagine Dragons的《It's Time》，柏豪說：「自己唔覺得似，所以冇回應！」