G.E.M.密室驚魂 高海寧揸車遭水淹

前晚突如其來的黑雨兼冰雹，導致本港交通一度混亂，當時高海寧正揸車接載父母及兩位弟弟返屋企，可謂一家性命盡在其手中！高海寧事後在微博報平安：「我剛開車回到家，沿途雨大到路都看不清楚，嚇死我了，幸好已安全回到家！」

昨晚她接受電話訪問時透露，當時與家人在沙田食飯，掛黃雨時已急急回家，擔任司機的她直言嚇餐飽：「個水撥係咁撥都睇唔到路，側邊有冇車都唔知，我喺高速公路都係開40公里，唔敢Cut線，巴士行過時啲水完全冚過晒車頭玻璃，返到旺角條路水浸至一線行車，啲大貨車經過時，全車都嚇到尖叫，爹哋係咁叫我慢慢揸，我都緊張到頭暈，又驚跣胎，惟有一直緊握軚盤！」

同樣嚇親的鄧紫棋（G.E.M.）困在錄音室一整天，昨日則獲美國洛杉磯舉辦的《第二十七屆兒童選擇大獎》頒發「最受歡迎亞洲藝人大獎」，難怪她心情轉好，High爆自拍短片答謝支持。

細細粒寫定遺書

除了G.E.M.，不少藝人都因惡劣天氣受困，由上海飛返香港的細細粒（陳嘉佳）在「嚇機」逗留十二小時，她昨日在電話坦言以為遇上劫機而寫定遺書：「機上面啲嘢跌晒落地，機師完全冇解釋咩事，坐我前面嘅兩位老人家拖手數佛珠，後面又有人睇聖經，自己預計係劫機，所以寫定遺書！」而滯留杭州機場的陶大宇亦在電話大呻：「原定班機取消咗，第二日要出過機場，司機載出機場途中因天雨路滑撞埋車，人冇事但心情勁Down。」而蔣麗莎和陸浩明亦在微博狂呻滯留機場的苦況。

此外，影帝謝霆鋒亦慘與經理人霍汶希（Mani）雙雙「流浪」數小時，Mani昨晚在電話訪問中透露，二人原定凌晨飛往意大利拍攝節目《十二道鋒味》，惟飛機延誤：「我哋周街流浪，搵到間餐廳飲咗杯嘢，但人哋要關門就請我哋走，相當徬徨！」