名模Mandy Lieu最愛周遊列國,早前便到意大利拍攝旅遊特輯,原來身材瘦削的她亦愛四處找美食,而且胃口不小!除了最愛吃的麻辣外,日本菜亦是其「飛佛」,她日前便趁空檔跟師傅學做壽司。雖然壽司的製作過程簡單,但相當考手勢,絕對知易行難!

Mandy不時到日本工作,最愛吃壽司。

師傅畀足心機,教Mandy如何切出厚薄適中的魚生片。

Mandy天生多手汗,包飯對她而言殊不簡單。

Mandy的製成品賣相吸引。

愛探索世界的Mandy,早前到毛里裘斯度假。

嵐喬日本料理

混血模特兒Mandy自小在馬來西亞長大,向來喜歡品嘗亞洲各地菜式,中國菜及泰國菜等都是其心頭好,因為可滿足愛吃辣的她。經常到日本工作的Mandy對日本菜情有獨鍾,當中特別喜歡吃壽司,因壽司沒有油,又飽肚,多吃亦無妨。

即場示範失威

Mandy經常希望在家中自製壽司,但認為「手勢」未夠成熟,故日前特別到友人開設的日本料理店學做壽司,她說:「鍾意伴日本芥辣食,一啖咬落去嗰種攻鼻嘅辣真係好正!最鍾意係食吞拿魚腩壽司同三文魚壽司,最抵食!肥美嘅三文魚夠甘香,但唔係周圍都整得好食,因為三文魚嘅厚薄好緊要,切得太厚或太薄會影響口感,所以師傅話一定要切得均勻。我覺得最難處理係飯,因為隻手太濕或太乾都唔得,會黐住啲飯,我天生比較多手汗,所以整前一定要令隻手乾爽先。」

師傅當日又特別教Mandy炮製海膽壽司,令她十分興奮:「啲海膽好新鮮,好甜!我覺得做壽司嘅食材要新鮮,同埋啲飯要有少少暖先係最好食,唔好太多飯,咁就最完美!」她又自言曾在家中自製壽司手卷,認為紫菜一定要新鮮脆口,但即場示範時卻把紫菜弄得「太軟太皺」,略為影響視覺效果,有待改進!

享受下廚樂

Mandy認為「食」是人生一大樂事,長大後才發現下廚亦是樂趣:「如果唔使開工,我鍾意煮嘢食,幾鹹、幾甜、幾辣都可以自己調校。加上自己煮始終健康過喺街食,所以我成日整定啲沙律,朝早做完瑜伽沖埋涼就食親手整嘅沙律,食完嗰刻覺得充滿能量!有時夜晚喺屋企煮啲小食,飲杯酒,聽吓歌,係一日最舒服嘅時候。」所謂「民以食為天」,Mandy年紀輕輕已深明這個道理,甚懂享受人生!

鮮味海膽一試難忘

Mandy今次到訪的嵐喬日本料理,由歌手劉浩龍、主持范振鋒及名模林莉經理人Bolie等開設,店內師傅有多年做日本菜的經驗。該店除提供壽司外,亦有燒物及烏冬等,招牌菜是層層海膽壽司,吸引不少名人前來光顧。