歌手陳慧嫻昨日到電台宣傳6月舉行的紅館個唱,她透露正進行地獄式減肥:「6個星期減咗8磅,要再減多10幾磅。」問到瘦身是否為了以性感戰衣上陣?她笑說:「唔Sexy,密實都要好瘦,希望唔再着以前啲公主裙,就算着都係透明公主裙。」她又指宣傳期間因過度操勞而捱壞身體:「有日瞓醒對腳啲肌肉、骨頭好痛,飲咗啲中藥,屙咗三次就好番。」

陳慧嫻為個唱積極瘦身。

另外,提到「演唱會之父」張耀榮逝世,陳慧嫻表示原本去年有合作機會,但因檔期問題未能成事,並說:「有次喺容祖兒個唱後台見到耀榮叔,佢叫我唔好企風口位,怕我感冒。」