霆鋒掃獎露毛做萌主
闊別音樂頒獎禮多年的謝霆鋒，前晚難得「出山」出席在深圳舉行的音樂頒獎禮，更一反常態「棄Cool取萌」，以卡通人物造型驚喜現身。而台灣天王天后周杰倫及蔡依林則「雙J」合璧，連聲帶爆血管的容祖兒亦畀面到場，星光熠熠！
霆鋒以「毛毛」卡通造型現身賣萌。
霆鋒攞到成手獎座，相當威水！
祖兒抱恙未能唱歌，但也親身領獎支持。
周杰倫與在台上表演的蔡依林緣慳一面！
蔡依林
韓劇《來自星星的你》主題曲原唱者LYn即場獻唱。
前晚第一屆《QQ音樂年度盛典》在深圳舉行，中港台三地紅星畀面出席，除邀得闊別音樂頒獎禮多年的謝霆鋒「出山」外，又有台灣天王周杰倫（Jay）、蔡依林（Jolin）、容祖兒及林俊傑等現身，大會更邀得韓劇《來自星星的你》主題曲《My Destiny》原唱LYn及韓國天王Rain出席，群星拱照頒獎禮！
周杰倫橫掃三大獎
獲封「年度最佳跨界男藝人」的霆鋒，難得現身頒獎禮，萬眾期待一睹男神型Look，不過一向Chok王上身的他，竟「棄Cool取萌」玩轉Look，以卡通人物「毛毛」造型現身變「Cute鋒」，成全場驚喜之冠！昨日他透過經理人回應，笑言想借「Cute」帶出新鮮感：「早前拍《十二道鋒味》着太多西裝，今次諗住搞吓鬼，隨心揀咗套卡通衫，想帶畀大家新鮮感。」
另外，Jay及Jolin「雙J」前晚難得同台，即成為另一焦點，雖然Jolin方面表示「若遇到會打招呼」，可惜兩人全晚前後腳表演兼領獎，唯一「同場」時刻，僅是Jolin上台表演時，Jay正好出場步入貴賓席，緣慳一面！當晚上台表演15分鐘的Jolin，竟化身「千頌伊」，每次出場就換一套衫，而Jay則成全場大贏家，橫掃三個重量級大獎，並與郎朗壓軸表演大晒琴技。
抱恙祖兒冇Sing出
至於月初因聲帶爆血管而要抖足三個月的祖兒仍抱恙在身，未有開金口獻唱。記者昨日致電祖兒，問到病情如何？她表示康復進度理想：「本來（音樂頒獎禮）避得就避，不過QQ第一年搞，自己都盡量去。雖然都好得七七八八，都有通知大會，當晚都冇唱歌，不過自己都好技癢。」而自認是「星星迷」的她，難得有幸現場欣賞LYn獻唱，不過她卻失望表示，因為當時手機不在身，遺憾未能及時拍下對方的表演。
