張家輝、吳彥祖及英皇老闆楊受成昨日出席英皇電影新片《魔警》記者會，楊生踢爆家輝答允120日拍攝期，但最終只得12日！家輝則笑指楊生只是講笑，更反過來要求老闆加片酬：「加番三兩億梗要！唔係點同荷里活看齊？」

家輝叫價加片酬三億，真係「獅子開大口」！

家輝與楊生在台上妙語如珠。

楊生與戲中一眾演員導演舉杯祝酒，氣氛熱烈！

張家輝、吳彥祖（Daniel）、思漩、導演林超賢及英皇集團主席楊受成博士昨日於會展出席《魔警》記者會，楊受成在台上大玩踢爆：「呢套戲慘呀！家輝話咗畀120日拍呢套戲，結果只係畀到12日，真係血淚史呀！」對於楊生的「投訴」，家輝笑說：「佢講笑啫！詐嬌呀！我對英皇不嬲都冇限期，我拍咗梗係唔只12日！拍呢套戲嗰時疊咗《掃毒》，可能楊生話我Overlap（重疊）咗，但我小演員邊話到事，係啲老闆話要開，我就要即刻開！（詐老闆型？）唔係，講個狀況出嚟啫！幫我反映吓！其實收得最平係我，加番我三兩億梗要！唔係點同荷里活看齊？」而導演林超賢被問到家輝是否只畀12日拍攝期，他說：「總之我畀親通告家輝都有嚟，但我都唔記得套戲拍咗幾多日。」

吳彥祖抑鬱唔理老婆

而Daniel則自爆為投入角色，以致拍攝時有少少抑鬱：「呢套戲應該係我演過最黑暗嘅角色，之前去柏林睇首映，完咗要上台講嘢我講唔到，因為拍得太辛苦，仲有少少抑鬱！但唔使睇醫生。為投入角色我刻意唔講嘢，成日呆望電視，撞啱太太大肚，我都唔好意思！所以拍完同佢去南非玩，佢明白我工作需要。（以後唔接黑暗角色？）我好鍾意黑暗嘢喎！我平時拍戲休息都會傾偈，今次唔傾，思漩應該會覺得我寸！」思漩則說：「我覺得Daniel情緒有點不妥，但明白他要配合角色。很多謝公司、老闆給我機會，拍這套電影讓我學習投入，令我一生難忘。」