「大美人」鍾楚紅（紅姑）及薛凱琪（Fiona）兩代美女昨日同場分享打扮心得，紅姑最鍾意烈燄紅色，而紅色唇膏令她更水潤精神！Fiona則會參考時裝情報，但化妝及穿衣全視乎當日心情而定。

艷光四射的紅姑入得廚房，出得廳堂。

鍾楚紅及薛凱琪兩大美女與商場及品牌高層一同剪綵。

淺露美腿的Fiona，對媽咪的愛心果汁讚不絕口！

周美欣表示有意學珠寶設計，稍後將為亞洲流行音樂節表演Hip Hop。

甄澤權的魔術神乎其技，氹得Fiona（右）及周美欣非常興奮。

獲大會送贈紀念品的紅姑喜上眉梢。

被譽為「大美人」的紅姑與歌手Fiona等昨日出席太古城中心「Beauty Zone」隆重開幕活動，現場請來魔術師甄澤權即席表演魔術，他更邀請Fiona及前港姐周美欣上台參與，掀起高潮！藝人陳爽、黃婉曼、王宝宝、歌手姜麗文及模特兒Alice B.亦有到場支持，星光熠熠！

恨男友「包食」

紅姑表示愛買唇膏及胭脂等化妝品，但自爆最愛「買餸」，崇尚自然的她更會親自種香料及香草。問到會否下廚給好友品嘗？她說：「最多六至八個人，西餐、中餐都識煮，好似火雞、八寶鴨都識，但自己煮會冇胃口食，因為有壓力，怕煮得唔夠好！」問到早前與劉嘉玲及關之琳吃飯是否她親自下廚？她笑說：「我哋出去食，我冇咁嘅本事，佢哋未有機會試。」享受一個人用膳的紅姑，被問到會否希望有男友陪？她笑說：「我都想，唔使自己煮。（男友要識煮嘢？）唔敢咁高要求。」另外，她透露將於五、六月舉辦慈善相展，並會拍賣自己的作品：「朋友都畀我拍晒膊頭，叫佢哋買。」

至於Fiona則因工作關係，少不免日夜顛倒，但每朝早都有媽咪為她炮製果汁，故倍感窩心！她透露有陣子經常飲用媽咪的愛心牛蒡汁，但不太喜歡草青味道。而她平日會留意時裝及妝容書籍，但不會盲目跟從：「化妝同着衫都係睇心情而定！」

Fiona讚阿澤夠放

此外，Fiona前晚欣賞好友杜汶澤主演的電影《3D豪情》，大讚對方演得專業又夠放。問到有否欣賞阿澤的身段？她笑說：「睇咗好耐，佢初初開始健身已經成日Show Off，成日周圍叫人摸佢啲肌肉。（佢有冇潛質成為AV男優？）我唔知，好少睇，冇得比較！」提到她於微博留言撐阿澤，卻遭網民留言反擊，Fiona表示有言論自由，她會接受批評及意見，但只會看好的留言。對於阿澤遭內地一位電影公司老闆封殺，問到會否擔心遭殃？Fiona說：「好多內地粉絲都好錫我，好似我上年喺紅館開演唱會，有五成都係內地粉絲，佢哋唔會單單為咗一樣嘢而唔愛我。（覺唔覺得阿澤慘？）唔覺慘，我同佢都有傾過，佢都唔覺得慘！」