昨日劉愷威出席活動為無綫谷新劇，他透露太太楊冪正在香港待產，很大機會在港分娩。另外，他直言雖然內心都好掙扎，但為了保持驚喜，未有向醫生查詢BB性別。他又表示會親自為BB剪臍帶，而爸爸劉丹則會負責改名。

劉愷威（右）難得返港拍劇，與李詩韻及黃德斌（左）喜相逢。

郭晉安與田蕊妮孭飛的新劇備受矚目，在片中更有多個激咀場面。

陳展鵬（左起）、鍾嘉欣及唐詩詠昨日出席活動時撞到正，三人合照時未因傳緋聞而尷尬。

劉愷威、鍾嘉欣、陳展鵬、唐詩詠、郭晉安及田蕊妮等昨日到灣仔出席《香港國際影視展2014》為無綫谷新劇，劉愷威透露懷孕六個月、正在香港待產的太太楊冪很大機會在港分娩，並直言未知BB性別：「想保存驚喜，所以冇問醫生，內心都好掙扎，唔知下次產檢忍唔忍得住問醫生！初期我都希望係女，想有個小公主，但依家就冇所謂，最緊要BB健康！（剪臍帶？）產房就一定入，如果醫生批准嘅，都一定會為BB剪臍帶，BB名就等我老竇改啦！（會唔會返TVB拍劇？）TVB依家咁多小生花旦，唔使我啦！（嫌TVB出手低？）唔係！今次拍劇，一來可以同汪明荃及黃淑儀合作，二來又可以喺香港，方便返屋企！」

陳展鵬讚唐詩詠筍

而陳展鵬與鍾嘉欣的緋聞傳個不停，近日又被指撻着詩詠，對此嘉欣笑說：「我個人鍾意簡單關係，唔想搞三四五角戀，我拒絕呢啲關係。」她認為展鵬與詩詠合襯與否在於內在條件：「對佢哋冇深入了解，但我認為最重要係內在配襯，外表係其次。」講到與嘉欣最襯的一定是伍允龍，她笑說：「我唔識答！咁我同阿龍係熟啲嘅。」而展鵬與詩詠則否認戀情，展鵬笑言因為他們太Dry才傳緋聞：「詩詠係好女仔嚟！人又專一，好開心能夠同優質筍盤傳緋聞，有時緣分就係咁開始，哈哈！」而與崔建邦成為過去式的詩詠表示，很難判斷與展鵬的發展空間：「緣分好難講，我都等緊呢個人出現。」