古巨基、任達華、譚耀文和思漩昨日與英皇集團老闆楊受成及高層利雅博等出席新片《衝鋒車》記者會。男主角之一的吳鎮宇因病缺席，華哥即抵死地說：「佢錢多又食好嘢，我懷疑佢今次食物中毒囉！」談到二人戲中性格火星撞地球，被導演安排連場吵架戲，有時吵到聲音震耳欲聾，他說：「同鎮宇鬧交鬧足30日，鬧到聲都沙埋，要飲蜜糖同雪梨水潤喉。」

任達華表示與鎮宇鬧交鬧到聲沙，要飲蜜糖水潤喉。

此外，基仔於戲中奉旨飛單車捉賊，並要接受專業單車技術訓練：「我仲買咗部幾萬蚊嘅單車用嚟入鏡，拍戲空檔都有喺片場表演花式畀大家睇。」他又指今次對白需要爆粗：「都算係一次突破，唸劇本準備時都會打電話去鬧吓人。其實鎮宇同華哥都有爆粗，不過我覺得聽落都幾順耳。」而戲中唯一的女角思漩則透露拍戲期間曾意外傷及眼睛。