甄子丹出席電影《葉問3》記者會，雖然早前有傳他以三千萬人民幣接拍，但老闆黃百鳴昨日表示以一億元與他簽兩部片約。子丹聞言後笑說：「一億円呀？」

子丹拍兩部片收一億，難怪笑到四萬咁口！

Lynn以超低胸造型出席時裝騷，明艷照人。

子丹（右）與老闆黃百鳴齊齊出席電影《葉問3》記者會。

有「宇宙最強」之稱的甄子丹與老闆兼監製黃百鳴、導演葉偉信及編劇黃子桓，昨日出席電影《葉問3》記者會。對於電影終於開拍，子丹解釋早前與導演葉偉信之間的檔期出現問題，並曾想過不再演葉問，但因世界各地太多粉絲甚至去信要求他演出，故決定再拍，但相信是最後一次。他又表示今次演出沒有壓力，笑言壓力在導演葉偉信身上，而他只會做好本分，又有信心票房勝過前兩集。對於有傳以三千萬人民幣接拍，他說：「三千萬円（日圓）呀？我一向好平，但片酬幾多唔講，講交情。」另有傳電影公司一度想換走熊黛林，問到是否由他出面挽留？他說：「由頭到尾都係佢演。唔係事實，傳聞唔想去答。」

交老婆詩詩管數

此外，有傳子丹欽點太太汪詩詩表妹湛琪清演出一角，他說：「仲荒謬、絕對荒謬，冇根據。（傳洪金寶同你反面而拒拍？）愈來愈荒謬。老闆黃百鳴話佢檔期問題拍唔到，我話過佢唔拍嘅話我都唔拍，但最後黃百鳴搵咗師傅袁和平出山，我先拍。」至於問到是次製作費是否不設上限？黃百鳴說：「今次再同子丹合作，其實係以一億元簽約兩部電影，至於另一部暫時未定。」子丹則說：「一億？円（日圓）呀？哈哈！未收到錢呀！錢銀交番畀老婆啦！」

Lynn接受反對聲音

另一邊廂，熊黛林（Lynn）昨晚以超低胸打扮出席時裝騷，對於由天王嫂變為前天王嫂，Lynn笑指不會感到唏噓：「單身仲好，鍾意點玩就點玩。」問到是否落實接拍電影《葉問3》？她說：「舊年電影公司宣布過，做葉問太太好榮幸。（有人唔想你做葉問太太？）每個人嘅思想觀念都唔同，未必可以令好多人鍾意我，有反對聲音可以接受。不過都多人問我幾時做第三集，我唔會令佢哋失望。」同場的樂基兒（Gaile）明顯比之前消瘦不少，她表示因近日患了感冒。提到黎明將執導新電影，Gaile祝福對方成功，問到會否入場支持？她說：「我未必喺香港，但會買DVD。」對於有報道指黎明在某派對中大受女性歡迎，她稱沒有看八卦雜誌：「佢本身係好受歡迎嘅男仔，佢開心我都戥佢開心。」