女歌手AGA放棄四年周遊列國的空姐生活,不理父親反對,甘願從低做起當歌手,慶幸遇上金牌監製舒文做伯樂,就連陳奕迅和李克勤亦賞識她的音樂才華,令AGA受寵若驚!

雖然父親反對入行,但AGA慶幸遇上伯樂舒文,令她決定闖樂壇。

Eason上網買AGA的歌來聽,令她受寵若驚!

AGA慶幸能為克勤作曲,更感激譚詠麟的照顧。

AGA不心急拍拖,目前以事業為重。

因爸爸彈結他,家姐唱Classic,AGA自細在家人的薰陶下愛上音樂。

為延續音樂夢想,AGA做空姐行列賺取學費。

去年進軍樂壇的創作女歌手AGA,在年初的音樂頒獎禮橫掃新人獎。出身音樂世家的她,從小已在家人的薰陶下成長:「爸爸係唱歌同彈結他,佢表演多數唱英文歌,細細個就睇爸爸表演,家姐就唱Classic,亦喺咁嘅情況下慢慢從佢哋身上學到啲唱歌技巧。」AGA喜歡彈琴,對音樂創作有濃厚興趣,但從未想過做歌手:「我當時只係想做能唱歌彈琴嘅表演者,好想同爸爸一齊演出,但佢要求好高,要我彈每首歌都識得轉唔同Key,可以隨時幫歌手伴奏,所以我就努力去學彈琴。」

做空姐搵學費

後來為達成讀音樂夢想,AGA投身空姐搵學費:「做空姐四年以嚟都有寫歌,亦因為鋼琴老師推薦下去出面彈琴演唱,喺一次機緣巧合識咗金牌監製舒文,之後我跟舒文去做音樂,大概一年後我把心一橫,決定辭咗空姐工作,趁後生做自己想做嘅事,去學寫歌同編曲,就算幾辛苦都係好開心。」

AGA自認是主觀很強的人,能說服她的人除爸爸外,第二個便是舒文:「欣賞舒文夠直接坦白,佢會同我講呢行發生咩事,佢問我想做Singer定Singer Song Writer?第一日開始已同我講做歌手搵唔到食,至少要花三至五年時間去Build up,怕我希望愈大失望愈大,最後可能零收穫。」

正正是舒文的「忠告」令AGA清楚眼前路難行,有心理準備下決定闖入樂壇,但AGA的父親則萬不願意女兒入行,怕女兒不能承受娛樂圈成名後的壓力。至於男友可有支持?她笑說:「冇男朋友,做空姐時有個男朋友,當時又要飛又要寫歌,分到畀男朋友嘅時間好少,所以依家冇係啱,除非遇到好明白你工作嘅男朋友,或者一樣咁忙可能都Work到。」她不心急拍拖,現首選事業,或者十年後還是「剩女」,屆時擔心也未遲。

被譚校長「糟」肥

論新人起步,AGA可說順風順水,簽約國際性唱片公司,與譚詠麟(校長)、陳奕迅和李克勤等天王巨星同門。AGA大讚譚校長很照顧後輩,全沒架子:「跟校長走咗好多場校園騷,佢成日提點我唱歌要注意嘅嘢,有時完咗騷又帶我哋班工作人員去食嘢,所以跟校長走騷有嘢學之餘,仲食肥咗!」

然而AGA首次作曲便為克勤「度身訂造」《鑽石人生》,她花了兩周嘔心瀝血去寫,到交歌前一天,舒文仍未肯收貨。最終寫到第二天七時,克勤採用了她的作品,還親自填詞,所以她很感激克勤令她對音樂創作打了強心針。AGA回想小時候聽着克勤的《月半小夜曲》、《大會堂演奏廳》……現在克勤竟唱着她的作品,感覺像發夢般。另一位AGA視為偶像的陳奕迅,首次見對方是環球的大型音樂會,心情超緊張,但陳奕迅親切地告訴她在網上有買她的歌來聽,令她受寵若驚,開心到不得了!