經常拍攝旅遊節目的黃翠如竟然老貓燒鬚，早前從南美回港時銀包被偷，幸獲黃浩然和洪永城兩位猛男攬攬又「求婚」呵番！

洪永城半跪向黃翠如「求婚」，可惜慘食檸檬。

黃浩然抱劇中囡囡Celine合照，加埋黃翠如似足一家人！

黃浩然、黃翠如和洪永城昨日宣傳新劇《愛我請留言》，剛從南美拍攝節目回港的翠如自爆回程途中首次遭逢偷竊，懷疑小偷趁她在飛機上熟睡時，打開機艙行李架偷走其銀包，她大呼老貓燒鬚：「勁醜呀！全Crew人得我有事，兩個銀包都偷咗！冇晒啲證件同損失幾千蚊，要攞行街紙，聽日仲要飛歐洲。」其後她與黃浩然和緋聞男友洪永城攬攬玩遊戲，更和洪永城重演胡杏兒的經典「我找到了」甫士，又以動作表達「Baby，嫁畀我好嗎？」及「下一世吧！」洪永城向翠如下跪，卻遭她一巴「車埋去」！

劇中與洪永城有咀戲的翠如大彈對方嘴唇「鞋」:「唔該下次搽番啲潤唇膏先！」洪永城則搞笑表示從未因而被投訴：「可能我太入戲當咗佢係女友，所以冇乜在意呢方面。（咀完感覺如何？）普普通通啦！係佢得償所願！我咀完只有一種親人嘅感覺。」

黃浩然多個「女」

而黃浩然透露與劇中女兒Celine建立了真感情，問到會否想追個女？他說：「唔好恭喜我喇，夠喇！（畀囝囝做童星？）咪嘞，冇命呀！」