阿澤遭恐嚇「小心田蕊妮陪葬」
杜汶澤與內地「反澤」人士爆發網上罵戰，直斥他們無理取鬧，豈料「辣慶」網友出言恐嚇「出街小心啲！」「小心田蕊妮一起陪葬！」雖然禍及老婆，但阿澤卻笑說：「老婆助手好肥，有咩事可以擋幾刀！」
阿澤指面對網絡暴力，藝人應該有社會責任。
全情投入拍劇的阿田攰到乸埋口面。
台灣民眾對《兩岸服務貿易協議》出現爭議，中、台兩地網民因意見不合而爆發罵戰，有份表態的藝人亦成為爭論焦點，連日來分享睇法的杜汶澤隨即「中箭」，不少內地「反澤」人士質疑他趁機炒作，紛紛在其Instagram聲討及反對他到內地搵銀，阿澤前日憤然反擊對方無理取鬧，他留言「如果你要對號入座是你的事，反正我說的是事實。不用再說甚麼：『有本事別來大陸賺錢。』我告訴你：『有本事阻止我來大陸！』他隨後更公開多名內地90後網友的肖像，表明他們是「反澤」人士。
阿澤的火爆言論可謂「辣」火頭，不少網民嬲上加嬲，批評他未經允許便上載他人頭像的做法「低招」，而其愛妻田蕊妮更慘被拉落「火海」！有人出言恐嚇阿澤指：「出街小心啲！」不少網友即和應兼愈講愈激，更進一步留言威脅：「小心田蕊妮一起陪葬！」雖然被網友恐嚇，但阿澤卻絕不擔心，他昨日接受電話訪問時笑說：「唔擔心！香港係法治地方，同埋我老婆助手好肥，有咩事可以擋幾刀，加上佢呢排喺TVB拍劇，守衞好森嚴，我有時都入唔到去啦！就算大家唔相信香港警察能力，都要相信TVB嘅Security！」
「50幾萬人鍾意我」
此外，阿澤昨日以監製身份出席英皇電影《雛妓》開鏡禮時，談到與網友對罵一事，他說：「呢個係有網絡同回歸之後嘅特色，根本冇得平息，有人覺得藝人唔應該加深中港矛盾，但我本身就係矛盾嘅一分子，面對網絡暴力，藝人應該有社會責任。」至於有網友批評他隨意上載內地90後網友肖像一事，阿澤說：「係咪我個樣見得就畀你鬧，你個樣就唔畀得人見？唔通鬧完人老竇老母個樣就唔畀得人睇嘅？（有八千幾人鬧你？）我有60萬人Follow，證明仲有50幾萬人鍾意我啦！」對於有傳內地封殺台灣藝人，他說：「呢啲負面恐嚇式新聞都唔知講嘅係邊個，真係封殺先算啦！」而講到黃秋生早前暗示不再跟他合作，阿澤則隔空寸對方說：「年紀大嘅人要有分析能力，對自己講嘅嘢負責任，但我自己喺Facebook寫嘢想令香港人開心，如果係咁鬧香港人係契弟有咩意思？何必傷害大家感情！」
