林奕匡 黃浩琳塑身大作戰

在外國長大的Phil眼見身邊每個同學都牛高馬大，故16歲便開始健身操Fit，而且是無師自通：「冇人教過我，我又冇搵教練，都係睇雜誌學。」學有所成的他亦不時充當朋友的免費健身顧問，他笑說：「女朋友係我第一個Train嘅人，佢瘦咗Fit咗又Strong咗！唔係講笑，佢玩啞鈴每邊20磅，勁過好多男仔！」他又感激有一個好動的女友陪他做運動：「我發覺有Partner一齊玩係好好，兩個人會夾啲。」

日跑45分鐘

相反，文靜的Lilian會用「討厭」兩個字來形容做運動：「本身唔鍾意做運動，郁吓都會攰，以前唔鍾意流汗，覺得好唔乾淨。不過體育堂又OK喎！因為成班同學一齊玩，但每次考試要跑步就會好大壓力，有啲同學好快跑完，我哋跑得慢嗰啲就會好有壓力，我都唔明點解佢哋跑得咁快！」偏偏最討厭郁動的她被形象指導勒令要跑步減肥：「佢話我肥，有好多鬼祟肉，我仲問佢邊度，點知佢話全身都有！依家每日都會去運動場跑45分鐘。」

為了加速Lilian的減肥計劃，Phil拉她到健身房，教她做一些簡單的健身操，用Lat Pull Down儀器幫她減去上身的贅肉，而舉啞鈴動作更有助減去全身肥肉，Phil說：「8至10下係一Set，女仔可以每樣做兩Set，然後每Set中間抖2、3分鐘。」

別看Lat Pull Down只是往下拉的動作看似容易，但Lilian拉了4、5下已經嗌攰，做完個多小時健身的她笑說：「我覺得自己好健康，好似即刻瘦咗幾磅咁，又可以再食多啲飯喇！」

未拉筋先熱身

相信大家都知道做運動前必須先做熱身運動以減低身體受傷的風險，但原來未暖身就拉筋，一樣容易受傷，由Phil教大家幾個做Gym前應做的熱身動作。

慢跑

「拉筋前應先慢跑5分鐘，比行路快少少嘅速度就可以。因為啲筋凍嗰時好繃緊，如果未熱身就拉筋好易拉傷。」

拉筋

「普通嘅拉筋動作就可以，主要拉手、腳嘅筋。」

畫鐵餅

「做Gym膊頭位好易受傷，要有足夠準備，拉親嘅話有排先會好番，所以用鐵餅打圈可以Warm Up細微嘅筋。女仔嘅話可以用2.5kg鐵餅，向前向後各慢畫兩圈，淨係用膊頭力，記得用另一隻手按住腋下位置。」

Lat Pull Down

Step 1：「捉住兩邊，唔係用手力拉佢落嚟，而係用背力，將手肘拉去背後。」

Step 2：「最重可以去到200幾磅，初初拉嘅話20至30磅就夠。」

舉啞鈴

Step 1：「單手拎啞鈴，手要直，彎身，腳微微彎曲。」

Step 2：「唔用手力，用身嘅Motion拉個啞鈴上到膊頭旁。」

Step 3：「將啞鈴向上推，手要直，整個動作要連貫。」