娜姐唔夠喉再睇1500萬豪宅

昨日《好報》披露早前以2,000萬元天價跟蕭定一簽電影合約的娜姐，出道多年吸金有道，加上知慳識儉，彈藥愈見充足，有見近日樓市冷卻，她實行重錘出擊，有意一口氣掃多個物業作投資，目標是跑馬地及何文田等地區。日前《好報》拍得娜姐現身跑馬地，到市值約4,000萬元的紀雲峰千呎單位巡視，又轉到張衞健及張智霖早前買入的同區雲暉大廈，睇約4,200萬元的中層單位，又對價值3萬元的名貴大燈情有獨鍾。

最緊要利家人健康

娜姐昨日又再次出動，本報記者拍得架着黑超的娜姐於昨晚約七時，在兩名朋友及地產經紀陪同下，到位於跑馬地黃泥涌道的永光苑巡視，逗留了約廿五分鐘。離開時娜姐見到記者，心情甚佳，更友善的地叫記者：「小心睇路！」永光苑樓齡十七年，盡覽馬場全景，據知娜姐今次睇的是實用面積679呎的單位，市值約1,500萬元！

娜姐接受本報電話訪問時直言有意買磚頭做業主，指對張智霖早前購入的雲暉大廈甚感興趣：「我覺得OK，交通又方便、地段又好、單位夠大，因為我係同父母一齊住，所以都要問佢哋意見，睇佢哋鍾唔鍾意！」跑馬地出名星光雲集，佘詩曼及張家輝等均居於此，有指原來娜姐睇中跑馬地風水好，加上該區物業價格夠「硬淨」，加上有相士指跑馬地旺娜姐事業。她說：「睇樓都要睇風水好唔好，同埋畀埋八字畀師傅睇吓夾唔夾。（要搵旺財屋？）因為同屋企人住，健康緊要啲！」對於被指吸金有道，買豪宅又睇名貴燈飾，娜姐說：「搵幾多冇刻意計，咁多年當然搵咗唔少，其實都係多有多使，少有少使，總知使錢地方使得啱就得！」