性感女星張暖雅（Angelina）與導演老公胡耀輝（Mark）恩愛度爆燈！Mark不介意愛妻打扮性感，但誓將對方「私有化」，禁止她為其他導演拍床戲！自信的Angelina則百分百信任Mark，對「飛來蜢」未驚過！

性感掛帥的張暖雅自信十足，自有一套御夫心得。

張暖雅指老公胡耀輝（左）不介意她行性感。

張暖雅去年經歷不愉快事件後，與老公胡耀輝患難見真情，彼此感情昇華，人前人後均有影皆雙。雖然她常以火辣造型示人，但Mark思想開放毫不介意，亦深明太太的賣點是性感，Angelina大晒恩愛地說：「佢不嬲都鍾意我似鬼妹嘅思想，佢覺得健康就OK，只要唔好同人拉拉扯扯，我都唔會亂咁出去蒲。我着得靚佢都開心，佢希望我人氣高啲、多啲人鍾意，佢好了解我係咩人，從來都好信我。」不過，她大爆老公的底線是禁拍床戲，並肉緊地笑說：「拍佢嘅戲就唔緊要、冇底線！但拍其他人嘅戲就唔得！（如果李安請你拍床戲呢？）咁佢會叫我嗱嗱聲去，驚我遲咗添！佢好醒目，只要高級、健康、靚就唔介意。」

御夫有術講默契

談到Mark拍戲時身邊靚女車輪轉，Angelina則表示未驚過，對老公百分百信任：「完全唔介意，一個男人要走點睇住佢都會走，個男人唔走，心入面就只會諗你一個，我會盡量做好老婆嘅角色。有時特登睇佢電話、日日不停打電話畀佢，男人反而會反感。（佢有飛來蜢？）我冇見過，如果有人同我講佢有啲咩，我絕對唔會相信，只會覺得啲人有問題，別有用心。」她認為做人老婆最緊要有自信，更分享御夫心得：「唔好睇住個老公，叫佢想點就點，想出去就出去，但只要佢出去我就出去，如果唔想我出去，咁佢就咪出去，但我唔會講出嚟，呢個係默契。」

Angelina私下喜歡與Mark談論工作，Mark亦會為她挑選劇本，她說：「佢喺娛樂圈耐過我，所以好多嘢佢都畀到意見，好多時我無助，佢都非常支持我，我有咩都會問佢意見，由佢揸主意。」事業心重的Angelina，未想過翹埋雙手做少奶奶，更謂不介意性感到40歲！