洪卓立與湯怡拍拖多年終可公開戀情，為了做個100分男友，他發表大男人宣言，決心要搵夠老婆本養起另一半，盡快成家「立」室，更不排除隨時旅行閃婚！

洪卓立被李國能「逼婚」，順勢向女友公開愛的宣言，好浪漫啊！

洪卓立預告賺夠就娶老婆，湯怡大可翹埋雙手等嫁。

洪卓立（左）與李國能擦番餐，唔知到時「洪門喜宴」有冇咁好餸？

英皇「金童玉女」洪卓立（Ken）與湯怡（Kathy）玩地下情玩足五年，早前終於守得雲開，獲公司首肯公開戀情。如沐春風的Ken早前接受新城DJ李國能《音樂通世界》訪問，問到可會考慮盡快拉埋天窗？他隔空向女友派定心丸說：「嘩！逼婚呀？起碼等我哋事業穩定啲先。我覺得要對另一半負責任，我都幾大男人，覺得結得婚就要有能力養佢。」

傳冷戰成公開契機

正積極儲老婆本的Ken又搞爛Gag，預告隨時閃婚：「可能無啦啦去個旅行就結婚，又或者行雷閃電嗰日就結。（要求老婆收山？）唔會！最緊要佢鍾意，我唔會逼佢做煮飯婆。」有傳兩人曾一度冷戰，Kathy一怒之下更搬離愛巢，他解釋：「呢個都係我想公開戀情嘅原因，雖然我哋都唔介意，但開始有朋友打來慰問，加上粉絲惡意攻擊佢，冇理由睇住佢畀人鬧都唔出聲！問公司都話畀公開。」

提到新歌《內有愛犬》是送給愛犬淇淇，原來Ken一直對愛犬於心有愧：「細個喺梳化唔小心跌親隻狗，可能撞到佢個腦，搞到佢智商咁唔聰明，反應好慢，有啲內疚。」