心臟有問題的馬浚偉日前因頭暈及血壓上升入院，他謂很擔心自己中風連累家人。經過今次事件後，馬浚偉決心戒甩每日飲五杯齋啡的壞習慣。

馬浚偉今次「死過翻生」後，決定戒飲齋啡。

麥長青與邵美琪攬頭攬頸，十分老友！

唐詩詠昨日露出性感小蠻腰宣傳《守業者》。

無綫劇集《守業者》演員馬浚偉、楊怡及麥長青等昨日到尖沙咀進行花車巡遊谷收視。馬浚偉日前因頭暈及血壓「爆錶」入院，留院期間他曾進行身體檢查，原因未明，但估計或與其心臟神經短路有關。他坦言當時最擔心是中風累及家人：「嗰日入到醫院頭暈眼花，後腦好似充血脹晒咁，手腳又不停咁郁動，血壓去到180度，醫生都驚我係中風，自己最驚中風唔死得連累家人照顧！」醫生指日飲五杯齋啡的他恍如慢性自殺，所以他也下定決心戒飲齋啡。而他又透露完成劇集宣傳後，今日會立即起程到美國登台。由於已賣門票及簽約，他必須如期前往，惟有帶備藥物傍身。

楊怡自誇天生靚女

對於被指整容拉近與羅仲謙的姊弟戀距離，同場的楊怡自誇天生麗質，保養得宜，又否認整容：「話我零瑕疵、又話我鬼婆鼻同安祖蓮娜嘴！但我呢排開工拍劇咁忙都冇時間休息，證明我保養得唔錯，天生麗質！（話你整容？）唔寫呢啲寫乜，好過話我壓力大爆瘡。（羅仲謙讚靚女﹖）唔係本來，係根本就靚女！」另外，麥長青笑言若收視不到42點會不停重播劇集，有人取笑他向亞視學習，麥長青則說：「點學呀，佢哋連32點都冇啦，點追都追唔到啦！」