「邪神」沈震軒炒車跌斷右手

無綫劇《使徒行者》由開拍至今一波三折，梁家輝以受傷為由未能接拍，而森美之後以健康為由中途辭演，邪門至極！前日下午，「邪」事繼續發生，頂替森美一角的沈震軒（Sammy）昨日在微博自爆跌傷手，並上載右手包紮相交代傷勢：「昨天拍劇時因不小心把右手跌斷了。現住院中！」

其後，在醫院的Sammy接受本報電話訪問，他指右手手腕骨裂：「當時喺中環石板街拍攝踩單車追賊戲，因為地面凹凸不平，加上單車太高速，令我收掣不及跌傷手。醫生診斷話我右手手腕骨裂，要打石膏。」Sammy雖經歷跌傷手，但他反而樂觀笑指當休息：「今次至少要兩個星期先好番，之前劇接劇好忙，今次當休息，呢個月接咗啲唱歌騷，可能要負傷表演。」

談到會否覺得《使》劇一波三折？Sammy亦直認：「都係！不過監製辛苦啲，因為佢要重新調配過場口。」由於Sammy和森美均是拍攝《使》劇中途「出事」，問他會否為角色辟邪？Sammy即自信地說：「唔係好邪啫！愈困難嘅嘢就愈具挑戰性。」而昨晚Sammy再度在微博留言，並上載一張包住手坐在病床的照片，並寫道：「剛剛做完電腦掃描！醫生也幫我做了詳盡的檢查，手術將會在星期五進行！」

不再換角

此外，《使》劇監製文偉鴻昨天在電話中描述Sammy的「出事」經過：「嗰場戲安排咗替身同武指去拍，所有危險鏡頭都冇事，但當Sammy拍踩單車戲嗰陣突然跣胎，而佢又Dup錯前Brake搞到車尾飛起，打觔斗跌落地。佢用右手撐地，所以搞到手腕骨裂。」

問到Sammy會否「被換角」時，文偉鴻說：「依家拍住Sammy啲大頭戲先！（搵人拍佢啲動作鏡頭？）仲搵緊！套劇本來諗住4月中拍完，依家要4月尾後先得。」

至於同劇的陳敏之事發前與Sammy一齊開工，惟她拍畢其戲份後則趕往另一個拍攝地點，故未有目擊事發經過。她亦承認劇集接二連三發生慘事，對於Sammy受傷，她說：「好彩唔係個頭落地先，如果跌親個腦就慘！（套劇延期影響大？）都大！之前森美唔拍，我同佢嘅戲份都未補完。雖然我同Sammy有好多對手戲，但相信時間可以遷就到。」