視后田蕊妮下月將於九龍灣展貿開騷，老公杜汶澤將由外地趕返港支持，問到會否請與阿澤傳不和的黃秋生睇騷，阿田即婉拒建議，並表示回應到秋生此為止。

阿田穿古裝拍劇，又自爆為個唱壓力大到發夢都開工。

阿田在拍攝期間不時整理斗篷。

佗着「巨蛋」開工的祥仔看似大肚，扮相搞笑。

田蕊妮與黎耀祥昨日為新劇《無雙譜》到屯門拍外景，阿田透露近日精神壓力極大：「我4月出碟又開Show，依家忙籌備，我會喺個Show度跳舞，總之好期待，近排發夢都係開會同背歌詞！阿澤會趕返香港撐我第一次，但係咪上台、做啲乜就仲諗緊，賣個關子先！」阿田早前被問到杜汶澤與黃秋生不和時，暗寸秋生應改名為「Anything Wrong」，秋生事後指十年前已為自己起此花名，對此阿田說：「咁我Out囉！（請秋生睇你個Show？）唔使啦！唔係咁好。關於佢嘅嘢，我要回應嘅已經回晒，點到即止啦！唔想沒完沒了！」

祥仔有意續約無綫

而祥仔則佗着劇中要「孵化」的道具蛋受訪，他說：「呢套劇比較輕鬆，同神話有關。（鍾意《巾幗梟雄》劇種？）都鍾意，各有滿足感，輕鬆嘅劇冇咁辛苦，觀眾亦睇得開心。」他又透露與無綫的合約將於明年中屆滿：「未咁快傾新約，我喺TVB好開心，工作人員識咗十幾年，我最怕陌生。（考慮去內地拍劇？）機會微啲，但我唔抗拒，隨緣啦！睇到時想法係點再決定。」