男星余文樂被踢爆與混血索模王惠敏（Ase）同遊美國而傳緋聞，Ase昨日在港出席活動時，毫不避忌大讚對方英俊及心地好，更不排除發展成拖友，亦願意為男友定居香港。

不時冧笑的Ase指願為男友定居香港，似係想講畀樂仔聽咁喎！

Lea T.即席沖飲品，看似有板有眼！

「龍嫂」Janine透露與Juno各有各忙。

閱女無數的余文樂與歌手吳雨霏分手後，即搭上混血索模Ase並一同外遊。昨日由泰國飛抵香港的Ase首度現身《Belvedere Lemon Tea產品發布會》，剛榮升父親的應昌佑任司儀，他透露兒子取名Travis，同場還有戴庚玲（Janine）及霍啟山緋聞女友Lea T.。

Ase甫現身即被追問與樂仔的戀情，只見她不時甜笑，並有備而來地說：「我冇男朋友，我哋係好朋友，識咗好耐，佢係一個好好嘅人。（有冇機會發展？）發展到咩關係先？（男女朋友？）唔知將來係點？但我仲後生，仲想周圍去。」問到樂仔是否其喜歡的類型？Ase即大讚對方英俊兼心地好，直言很喜歡跟他聊天及聽取意見，又認為內在美比外表更重要。Ase自稱單身，問到樂仔是否同樣單身？她笑說：「好似係，其實唔想計劃太多，希望生活順其自然！」她透露在泰國經營髮型屋，故現時泰國香港兩邊走，但若有個香港男友，亦不介意定居香港。

「龍嫂」背後撐

此外，昨日是歌手麥浚龍（Juno）的生日，問到「龍嫂」Janine如何慶祝？她說：「遲啲先慶祝，今晚都食唔到飯，因為大家都忙！（準備咗禮物未？）準備咗，想特別啲。」現時主力教小朋友英文的她，問到可會因此想生小朋友？她說：「反而唔會，因為要好有耐性。（有冇計劃結婚生B？）未諗。（咁佢係咪你結婚對象？）唔知，順其自然！」Janine指不會參與幕前演出，因為不是演員，哪是否要做Juno背後的女友？她笑說：「係啩！」而Lea T.則表示平日愛跟朋友去派對聊天及欣賞DJ打碟，熱愛音樂的她曾學過打碟。