港姐出身的袁嘉敏去年轉到大銀幕發展，雖然起初不太習慣，但她坦言自小便學習獨立。縱然「升呢」拍戲，但為了搵錢，她戲照演、劇照拍，只要有工開就得！

袁嘉敏珍惜每個機會，無論是拍電視還是電影，都會瞓身投入。

在電視圈浮沉多年的袁嘉敏，舊年「升呢」踩入電影界，為夢想踏出一大步。

袁嘉敏（左）有幸參演電影《賭城風雲》，並與發哥大演對手戲。

在公仔箱浮沉多年的袁嘉敏（Candy）去年大突破，簽約Paco旗下的新公司，由公仔箱跳入大銀幕，為夢想踏出重大一步，她說︰「2013年轉變好大，做到一啲自己想做嘅嘢，好慶幸有人畀機會我！」由長留香港工作，到離開香港飛到台灣和日本拍戲，她坦言起初有點不習慣，但當是一種磨練︰「因為留喺嗰邊比較長時間，好似去台灣留兩個星期，晚晚5、6點離開酒店，拍到天光食完早餐先返，因為電視台一大班人開工收工，但電影世界係孤立嘅，但咁樣會令自己再獨立啲，好似長大咗！」

難忘下水戲

提到早前有幸演出由周潤發主演的電影《賭城風雲》，Candy直言與前輩合作獲益良多，又大讚發哥Nice爆︰「同發哥拍戲好開心，佢好照顧我哋呢班資歷淺嘅演員，佢好主動過嚟同我哋握手，佢仲好鍾意自拍，每一日開工都會。如果未埋位時佢會同大家講往事，好似以前喺無綫嘅經歷都會同我哋分享。」談到拍攝時最難忘的事，她笑言是在眾人面前穿上比堅尼︰「當時喺泳池拍，因為第一次着比堅尼拍戲，有啲唔慣，覺得好尷尬！」

有工開就滿足

問到喜歡在公仔箱還是在大銀幕發展，Candy表示沒有想太多，只要有工開就很滿足︰「其實我係保持平常心，無論戲院同屋企電視播，我覺得冇乜分別，只係多咗外景唔喺香港，如果要我揀，會以拍多啲戲行先，但有劇拍都唔會放過呢個機會，總之有嘢做就得！」