今年元旦結婚的梁烈唯透露已不設防造人，他又透露原定今年十月會補擺喜酒卻因工作關係而延遲，人逢喜事的他又百無禁忌表示已想定身後事的安排！

恨生B的唯唯希望湊個「好」字。

原本與太太Tina十月補擺喜酒的唯唯因作關係而延遲。

無綫藝人梁烈唯日前回電視城為新劇《使徒行者》拍攝，選於本年一月一日與相戀多年的女友Tina註冊結婚的他笑言，見到身邊朋友都已有小朋友，故亦十分恨有B。

唔急擺酒

尚未擺喜酒的唯唯原定於十月補擺，不過因工作量太多的關係會延遲，他說：「同老婆有共識想搞好啲個婚禮，如果我哋有咗，就會等BB 3歲時先擺，因為3歲就開始有記憶，可以同我哋一齊參與件大事，仲可以做埋花仔或花女。（不設防造人？）係呀，都有計劃迎接，依家等個天安排啦。（想生仔定女先？）之前覺得仔嘅，不過近排見到朋友啲女好嗲，又真係好正，所以冇所謂，最緊要健康，一個『好』字就最好。」

問到等BB長大後才擺酒，雙方家長會否接受時，他說：「都OK，擺酒就一定會請晒所有親戚朋友，依家所有人都知我哋係一對，所以都唔需要太急。」唯唯又表示人生有兩個Party最重要，一個是結婚，一個就是「瓜老襯」：「有機會都會預先諗定葬禮點搞，希望可以參與多啲細節。」人逢喜事精神爽的他果然百無禁忌！