呂慧儀以透視Look騷長腿充當活動司儀，跟代言隱形眼鏡的孖女組合AOA在活動上，輪流自爆分別曾被螞蟻襲擊及懶惰而搞到眼睛又紅又腫，幸沒有影響她們的電眼。

穿上飄逸白色長裙的呂慧儀，美腿若隱若現。

AOA希望隱形眼鏡能帶旺桃花，有仔埋身！

無綫花旦呂慧儀跟孖女組合AOA昨日出席隱形眼鏡活動，穿上白色透視紗裙的呂慧儀，大騷白滑長腿，會上呂慧儀自爆以前試過螞蟻入眼，搞到眼睛紅腫發炎，而AOA的細Ann也自爆小時候因為懶惰，試過戴住大眼仔瞓覺：「我只係戴咗一個鐘，對眼已經發炎咗成個禮拜，依家真係唔敢貪方便唔除隱形眼鏡。」

而早前公開撐黃秋生角逐演藝人協會會長的呂慧儀，對成龍最終擔任會長一職，坦言事後未有再聯絡秋生：「冇再問佢，佢係前輩有佢自己決定，成龍做會長都OK呀，資歷豐富，好適合做呢個位。」她又承認已經加入演藝人協會成為會員，不過選會長當日她因為要開工而未有投票。」對於秋生近日與杜汶澤爆罵戰，她繼續撐秋生：「敢言未必係壞事，佢好有自己思想。（驚唔驚佢鬧埋你？）唔會！佢對我好好，佢係好人前輩加好朋友。」

AOA恨行桃花運

首次做隱形眼鏡代言人的AOA坦言夢想成真，細Ann說：「新年許咗個願，想有代言廣告。」大Ann則表示兩姊妹在讀書年代都是四眼妹，故甚少男仔埋身：「副眼鏡擋晒啲桃花，依家戴隱形眼鏡，希望今年桃花好啲啦！」