大方合照的陳展鵬（右）與蕭正楠，力證冇不和！
陳展鵬及蕭正楠兩位無綫力捧藝人昨日惹是非，有傳展鵬不滿同經理人的蕭正楠搵銀工作多過自己。但他們對此齊聲否認，並指坊間謠傳不會影響兩人的兄弟情！
蕭正楠（左起）、田蕊妮及陳展鵬早前結伴登台搵銀。
王祖藍無辜被拖落水。（資料圖片）
近年在無綫發展順利的陳展鵬及蕭正楠，已成為無綫力捧小生之一，劇集一套接一套，忙得不可開交，人紅自然容易多是非！昨日有指二人同屬一個經理人，展鵬因蕭正楠接的搵銀Job比自己多而不滿。
經理人「大細超」
他們昨日拍攝宣傳片時被問及此事，兩人齊聲否認，更指兄弟情有增無減，傳聞絕不會傷害到兩人的感情！蕭正楠說：「冇啲咁嘅事，我哋關係愈嚟愈好，啱啱先一齊去咗雲頂登台，之後都會一齊做登台Show。」陳展鵬則搞笑地說：「經理人真係有大細超，不過係對眼，接唔接到Job都要睇個客戶，同蕭正楠由小學識到依家，好有緣分，唔會因為呢啲新聞而影響大家感情。」
眼紅王祖藍?
蕭正楠表示經理人旗下有很多藝員，冇可能比較：「我哋經理人都要照顧好多藝人，唔通我又眼紅王祖藍多嘢做咩？」他透露月底將開拍新劇《商戰》，由於劇中要打泰拳，故最近積極操練腹部肌肉，有時操得太厲害而險休克！
影視組
