大美人李嘉欣大爆三歲寶貝仔許建彤（Jayden Max）開始反叛，更斗膽直指同學比她漂亮！雖然老公許晉亨已即時幫口話「冇可能」，但仍令Michele慨嘆青春不再，得不到囝囝垂青！

大美人李嘉欣大爆囝囝嫌她唔夠同學仔靚，令她哭笑不得。

見到囡囡Red咁叻表演芭蕾舞，難怪郭錦恩笑到見牙唔見眼啦！

馬詩慧（右）與囡囡王曼喜盛裝出席活動。

大美人李嘉欣（Michele）昨日出席鞋履活動，大會請來郭錦恩囡囡Red表演芭蕾舞，台下的郭錦恩更拿着手機拍片，為囡囡記錄珍貴時刻！而Michele則喜獲大會送上由兒子Jayden親自挑選顏色的鞋履。

Jayden嫌唔夠靚

Michele坦言看到Jayden日漸長大，說話開始有紋有路，便覺十分不捨。她更透露三歲的兒子開始有點反叛，會堅持自己的原則，更曾斗膽認為同學比她漂亮：「之前佢生日，會場嘅裝飾氣球印咗我同佢同學嘅樣，佢話同學靚過媽咪好多。雖然爸爸（許晉亨）都有即刻幫口話『Impossible，冇可能』！（嗰個同學咩樣？）可能佢鍾意青春，媽咪始終係媽咪，平時喺屋企紮住頭髮又素顏，可能佢唔欣賞！」

此外，Michele又透露兒子最近愛黐爸爸多過自己，但卻認為亨亨得到囝囝的愛戴是應得的：「Jayden病咗，今朝我同佢睇醫生，佢（許晉亨）特登趕嚟診所畀驚喜我哋，抵Jayden錫佢！Jayden病咗佢會好緊張，我都有唔舒服，不過冇人問過我。（有冇向老公投訴？）冇，慳番啖氣好啲。依家要教仔，唔好動不必要嘅氣！」而同場的馬詩慧亦有帶囡囡王曼喜出席活動。