張敬軒皇帝蕉挑戰哈利仔
為舞台劇搏到盡的張敬軒，苦練兩個月操Fit「靚股」拍海報之餘，更不排除獻出第一次裸露演出，誓要向同樣曾在該劇英國版全裸上陣的「哈利仔」丹尼爾烈格夫（Daniel Radcliffe）挑機！一「股」作氣豁出去的軒仔，更口快快自詡「皇帝蕉」，即慘被好友蔡卓妍（阿Sa）當眾揶揄。
軒仔為演好舞台劇，花了兩個月操Fit「靚股」挑哈利仔機。
軒仔自詡「皇帝蕉」，即被阿Sa取笑。
陳家樂（左起）、吳浩康及Johnny出席活動，更踩單車贈興。
胡杏兒與吳卓羲Chok甫自拍。
張敬軒（軒仔）、蔡卓妍（阿Sa）、Closer成員吳浩康及Johnny、陳家樂、胡杏兒及吳卓羲等昨晨出席活動，期間司儀擺杏兒及李思捷「我找到了」的緋聞上枱，連軒仔及阿Sa上台時，亦「玩嘢」轉身扮杏兒在微博照的甫士抽水。
拍宣傳照冇打格
將參演舞台劇《EQUUS》的軒仔，笑言近期興除衫，並坦言不介意效法「哈利仔」丹尼爾烈格夫的英國版本全裸演出，而曾在該劇全裸演出的哈利仔，近年愈演愈激，繼2007年於舞台劇《EQUUS》中大玩全裸演出後，又在電影《Kill Your Darlings》中飾演「同志」詩人，並與男拍檔全裸床戰，無論意識及尺度都相當大膽，今次軒仔參演港版《EQUUS》，可謂向哈利仔挑機！已拍攝背面全裸宣傳照的軒仔說：「冇打格，背面睇晒，今個月中喺各大巴士站會見到一個全裸嘅張敬軒。（驚畀人禁？）呢啲係為藝術犧牲，同Karen（莫文蔚）差唔多，成個側面。」他又坦言有刻意練「股」兩個月：「我以前係潛力股，練咗兩個月變優質股。（嚇親媽咪？）冇通知佢，我唔夠膽，但佢知我接呢個劇，都叫我唔好搞到咁兒童不宜，因為佢唔知呢個係英國嘅劇本，以為係有不雅成分嘅劇，佢唔知係套高雅嘅劇本，我都冇偶像包袱。」
盼角逐專業獎項
問到會否裸露，軒仔稱暫未決定：「要排戲先知，要睇靚唔靚，我哋個演法同哈利仔個演法唔同，英國版本有性愛場面，但今次個台270度未必就到位，而英國做法係男女全裸，我對手係方皓玟，所以排戲先可以衡量吓個尺度。」但一講到不介意當眾裸露演出時，身旁的阿Sa即笑說：「我介意呀，好驚！」軒仔反駁：「裸露戲唔係賣點。」記者卻笑言是個焦點，阿Sa即大灑鹽花：「係一隻蕉個『蕉』！」軒仔口快快自稱「皇帝蕉」，豈料阿Sa繼續取笑軒仔並用手比劃：「皇帝蕉咁（短）咋喎！」無辜「中箭」的軒仔惟有尷尬笑說：「冇話係我喎！」相當搞笑，今次是軒仔第四度演舞台劇，他希望憑該劇獲提名及角逐舞台劇專業獎項。
