黃婉曼樂做小女人

黃婉曼（Icy）今年踏入30歲，很多女生都存在一種迷思，就是希望在30歲前嫁出去，但Icy原來自小已嚮往家庭生活，亦非常喜歡小朋友，所以恨嫁並不是因為「限期」到，她說：「由細到大都有諗結婚，想有家庭，女人事業幾叻都好，有家庭先係一個圓滿人生，而且我不嬲想生3個小朋友，早啲生好啲，多啲精力陪佢哋玩，不過呢樣嘢人生強求唔到，惟有順其自然啦！」她又表示喜歡肖馬的小朋友，如果趕不及便要再等12年。

相處點滴甜到漏

提到結婚生BB，她與拍拖1年多的男朋友有共識，既然一個願娶，一個想嫁，為何還不行動？Icy解釋未婚原因：「年紀上差唔多，上年又講到火紅火綠話結婚，但原來真係需要時間編排，唔係話結就結，我都想好瀟灑咁簽個字就算，但好多嘢要交代畀長輩，好頭痛，要諗點擺酒，請咩人嚟，酒店又Full。」現階段她更不介意奉子成婚：「依家我覺得有咗先結婚OK，以前就唔得，老一輩都睇開咗，冇理由後生唔得，佢哋覺得有孫抱就得。」

Icy視男友為結婚對象，談及平日的相處點滴更是甜到漏，她笑說：「我係幾好嘅女朋友，幾聽話，就得人，好專一同賢良，我成日覺得咁難得有個人愛你，依家有好多男仔都好花弗，搵到一個好專一要好好珍惜，同埋感情嘅嘢冇必然，兩個人一齊冇話一定會幸福，如果兩個人夾嘅，就要珍惜。我個人好老土，成日覺得做錯事個天會懲罰你，我一定要做到最好，個天先會畀最好嘅我，所以我會做好女朋友本分，要好關心佢，照顧佢生活起居，仲要識煮飯！佢話攰，我會叫佢抖抖，又唔會餓死，我話最多我養你！」相信男友聽到一定冧到爆！發表如此Sweet的宣言還不夠，原來Icy還是一個永不駁嘴的女朋友：「我事無大小都唔會反駁，陪邊個父母，去邊度旅行，未來應該點，唔太郁動我原則嘅嘢，我都會接受，通常唔會嗌交。」

定時送咖啡貼心

她又自覺不是浪漫的女朋友，但可以細心的時候，都會盡量細心：「我係實際型，例如男朋友熱氣，就會買定涼茶畀佢返公司，等佢想飲就飲，佢呢排做嘢辛苦好攰，我會買定杯咖啡喺佢樓下，搭正9點就遞畀佢，類似呢啲，唔係話好浪漫嘅。」但她甜絲絲爆男友曾寫情詩給她：「佢係英文人，但用中文寫詩畀我，我就覺得幾才子，又押韻，我都寫唔到，都肉麻o架！但覺得驚喜。」而兩人相處之道就是貴乎坦誠，因為她不喜歡估來估去，如果要猜度最心愛的人，彼此就不能真心相愛。

是非不斷　男友呵番

女星「變臉」新聞不再是新鮮事，Icy也多次被傳整容，但每次她都從容不迫地否認，她承認當初看到報道有感到不快：「依家就覺得如果人哋睇到自己有錯誤地方，我會改，如果冇錯，啱嘅路就會繼續去做。」她又表示男友反而會安慰她：「得啦！有得上報紙就得啦！」她還會提醒自己努力工作，讓別人見到她的工作表現，因為她想作長線發展：「我要嘅唔係一剎那演藝事業，想壓得住台，做口齒伶俐嘅主持，我覺得要用時間儲，慢慢做，10年20年大家總會睇到。」

後記：擔心幸福轉瞬即逝

Icy很健談，經常笑容滿面，的確是很好的受訪者，每當談及戀愛話題，她也會如小女生般津津樂道，似乎是沒有甚麼煩惱的人，但她卻自覺是個悲觀的人，因為她覺得世界上沒有甚麼事情是必然的。有時候她感到很幸福，但下一秒就會擔心會否失去「幸福」，不過正是這種「危機感」的個性，令Icy更懂得珍惜眼前的一切，未嘗不是一件好事。