岑麗香與日模松岡李那昨日出席品牌活動，在加拿大讀書的香香透露，當地讀書不用穿校服，返學鞋亦不受限制，故有很多女同學見她所穿的鞋美，竟日日要求與她換鞋，令她哭笑不得！

岑麗香（左）及松岡李那晒長腿出席活動，立即成為全場焦點。

現時家中約有50對鞋的她，笑言買鞋不一定只挑名牌：「幾十蚊一對同超過二千蚊一對都有。（睇男仔會唔會睇腳先？）聽過話睇男仔對鞋可以知佢性格，如果對鞋靚，應該都會幾貪靚！」她又表示曾有人贈她一對鞋，還向她收取兩蚊：「因為唔想鞋鞋聲！之前我返加拿大有買鞋畀屋企人，都有問父母攞兩蚊，佢哋O晒嘴，但佢哋好開心我融入咗香港文化。」提到馬來西亞空難，香香擔心地說：「我會為佢哋祈禱，希望佢哋會冇事啦！」

而松岡李那則以6位數字擔任一年代言人，她表示緋聞男友林德信亦曾送鞋給她，問到她有何表示時，松岡即哈哈大笑說：「幾日前我幫佢搞咗Surprise Party，叫晒佢啲好朋友嚟。（咁佢有冇送Birthday Kiss畀你？）佢好開心，有好多男仔朋友搽晒Lip Gloss（唇彩）錫佢，搞到佢成塊面都係唇印！」