胡杏兒與Mandy Lieu擔任黃秋生及黎芷珊主持的節目《燭光晚餐》嘉賓，秋生甫到場即與助手密斟，原來是嘉賓突然由顏卓靈變了杏兒，他說：「冇諗到問乜喎，唔識問咪低頭食嘢囉！顏卓靈就好多嘢問。」提到杏兒與李思捷「公布戀情」與全世界開了個玩笑，他稱不知情：「依家你哋講咪知囉！佢咁百厭？咁幾有童心吖，做呢行係要咁，演戲嘅都想呃到人啦，好似盧海鵬幾十歲都仲好過癮！」

杏兒日前與思捷合謀攬攬「報喜」，一反其認真作風。

黎芷珊（左起）、杏兒、秋生及Mandy於節目中談笑風生。

至於杏兒則否認「執二攤」﹕「芷珊姐姐一直有同我度期。（秋生話你百厭！）以後唔喇，我冇陰謀、冇報復、冇試水溫，亦唔係博頭條。」問到是否思捷主意，她默認說：「咁都話我做人太認真，如果有80歲命都只係得2萬9千幾日，咪玩吓囉！（真係唔驚『狼來了』？）唔會，總之答應大家，如果拍拖我會拖出嚟開記者會。（思捷追咗你3個月？）佢唔係溝女王，係好人一個，大家係好朋友，我唔係佢心目中嗰杯茶，冇追我三個月。（思捷舊愛王宝宝拖異性報復！）任何故事引伸落去都一定有新角色，我識嘅王宝宝好Nice！」