偉仔稱帝影后子怡High爆
《香港電影導演會25周年晚宴暨年度頒獎禮》昨晚舉行，剛失落奧斯卡的電影《一代宗師》成為大贏家，梁朝偉與章子怡膺「最佳男主角」和「最佳女主角」，導演王家衛則奪「最佳導演」及「最佳電影」。
偉仔與子怡首次憑《一》片同時奪得影帝影后。
奪得「最佳導演」的王家衛表示得獎勝過千言萬語。
穿透視閃片裙的子怡，相當誘惑。
奪得影后的子怡與王家衛擁抱。
嘉玲到場後即與爾冬陞雞啄唔斷。
一眾導演合照，夠晒氣勢。
昨晚假灣仔會展舉行的《香港電影導演會25周年晚宴暨年度頒獎禮》星光熠熠，雲集中港兩地導演和演員，包括章子怡、梁朝偉、劉嘉玲、王家衛、爾冬陞、張家輝、舒淇、曾志偉和黃秋生等，場面熱鬧！導演會頒獎禮一直被視為金像獎的賽果指標，最終電影《一代宗師》成為大贏家，梁朝偉憑《一》片膺影帝，而子怡更憑《一》片第7度封后。王家衛則獲頒「最佳導演」和「最佳電影」。
金像獎順其自然
專程從內地來港的章子怡身穿透視閃片裙赴會，並疑似透T-back，有愛情滋潤的她與拍檔梁朝偉孖住行地紅氈，心情勁靚，當負責頒獎的鮑起靜和惠英紅宣布子怡得獎時，她即與身邊的偉仔及王家衛擁抱，她致詞時說：「多謝王家衛同梁朝偉，部戲有偉仔先可以咁好，多謝佢陪宮二（片中角色）咁多年，呢個角色係美麗、永恒。」其後她受訪時坦言每次得獎心情也不一樣，問到可有加強奪金像獎的信心，她說：「順其自然啦！（《一》片失落奧斯卡可惜？）可惜，不過奧斯卡是好難去想像，不是那麼簡單。」
此時，台上又宣布梁朝偉奪影帝，子怡即拍手叫好，她表示與偉仔首次一起得獎，問到會否跟男友汪峰分享，她說：「開心事會同不同的人分享，包括家人朋友愛人和戲迷。（下一步結婚？）沒有，不過女人都渴望有家庭，找個歸宿，不過要天時地利人和。（你找到歸宿未？）哈哈哈！」
嘉玲想玩笨豬跳
至於偉仔則認為《一》片失落奧斯卡很可惜，但認為取得入場券已很好，希望將來華語片有更多機會，提到劉嘉玲表示想旅行玩笨豬跳，偉仔即說：「吓，我唔敢。（你唔畀佢跳？）又唔會。」而王家衛上台領取「最佳電影」獎項時，他表示得獎已勝過千言萬語，領獎後已落台的他又再奪得「最佳導演」，他再上台時笑說：「我好佩服子怡上台講唔同說話，我都係嗰句，多謝。」此外，跟偉仔並肩而坐的劉嘉玲表示剛由英國返港，對於好友王菲和謝霆鋒被指將在巴黎世紀重逢，她說：「大家係朋友，見吓面有咩出奇，唔好大驚小怪。（網友想佢哋復合？）復唔復合都冇所謂，講緣分。」
