與容祖兒合作無間的音樂人伍樂城，昨日在電台訪問中分享與樂壇天后的相處點滴，他指祖兒是真心愛唱歌之人：「佢好有力量，好似有用唔完嘅氣力，錄音嗰時要我逼佢先肯休息，但就算休息緊，佢都係不斷唱同不斷哼歌，佢真係好鍾意唱歌，係百分百嘅歌手性格同條件。」問到可會覺得祖兒的唱腔在她蜜運後有改變？他卻不作正面回應：「其實佢唱咗都一段時間，每個階段嘅唱法都會有唔同，依家會係成熟啲嘅演繹。」

伍樂城大讚祖兒專業又唱得，唔做歌手真係嘥晒。（資料圖片）

另一邊廂，聲帶受損的祖兒昨日加入愛玩瑜伽的朋友堆中，偕熊黛林、黃佩霞、伍詠薇、張智霖、袁詠儀及周汶錡等出身汗，並大擺瑜伽甫士合照。出名皮膚好的祖兒更素顏上陣，並留言表示做運動好Happy！