黃貫中（Paul）的女兒「叉燒包」人仔細細已愛烹飪，還炮製特別菜式給父親品嘗，雖然只是玩具唔擺得入口，但慈父阿Paul竟放入口扮食，只為氹女兒開心。

黃貫中與朱茵的女兒「叉燒包」現在已經1歲多，女兒除遺傳父母親的個性基因外，仲有埋朱茵的烹飪天分，跟不少女孩一樣，「叉燒包」愛玩煮飯仔，近日還整了一味首本名菜，連阿Paul都大讚夠晒特別，他在微博說︰「女兒很孝順，才一歲多的她，已整天埋首烹飪，今天是她的首本名菜：大肉蟹炒企鵝頭伴小跑車，令人食指大動，百吃不厭。」

有大肉蟹，又有企鵝頭，還有小跑車，明眼人都知唔可以擺落口，不過身為慈父的阿Paul為氹女兒開心即扮食，未知是否「叉燒包」都知道唔放得入口，當阿Paul扮食時她則大笑，阿Paul說︰「當我假吃得津津有味的同時，她居然在偷笑，我一陣鼻酸，乖乖，你長大了！淚……」此舉搞到鐵漢都有柔情一面，雖然很感性，但阿Paul會否想女兒學結他多過煮飯仔呢？