許亦妮星光背後

去年絕對是許亦妮（Whitney）事業上的轉捩點，由年頭劇集《老表，你好嘢！》的Monica D.，到年中電影《喜愛夜蒲3》女主角Jolie，再到劇集《舌劍上的公堂》的啞女阿獨，都是具發揮力而重戲份的角色。

2011年參選港姐奪季軍至今，Whitney用上兩年多時間已完成不少演員夢寐以求的事。不過，風光表面亦有暗湧，報章及雜誌上關於她的報道幾乎都是負面，與女生傳不和、與男生則被指拜金及釣金龜，令她一頭霧水。她說：「我都唔知點解，當時同啲女仔唔係好多對手戲，都係拍完後宣傳先見多咗面。其實同雨僑、何佩瑜都幾開心，所以啲新聞好無厘頭。」

雖然似是同性緣較差，但她透露私下有不少女友人：「我都有好多錫我嘅女性朋友，一Friend就好Friend，友誼永固嗰種！雖然入行唔耐，但圈內同朱晨麗、朱千雪好好朋友。」

經常傳緋聞的她笑言並非「電力驚人」：「邊度有！以前覺得點解唔可以有男性朋友？但入行後先知原來真係唔得，會冇咗私人空間。依家連單獨同男仔出街都唔敢，所以做藝人要檢點，怕令人誤會。」靚女必定多桃花及追求者，Whitney生日時便收到99支玫瑰，她還自爆有人追：「女仔有人追係正常，交朋友開始都唔會話追唔追，係了解過程嚟。」但她透露玫瑰是由女友人所送：「我都成日送花畀佢，自己又鍾意收花。」

談情開條件

Whitney又透露現時的追求者及前男友都是佔有欲較強的人：「佢哋控制欲超強，曾經有男朋友叫我放棄事業。但我係事業型女性，唔可以喺屋企歎世界。（覺得男人靠唔住？）唔係，可能媽媽都係事業型女性，所以灌輸咗呢個概念畀我。」她期望遇上令她安心的男人：「喺事業上體諒同包容我嘅人，同埋雙方要投契。如果遇到就開始發展，但其實幾難！」

偏愛熟男

對於經常被指拜金，許亦妮無奈地說：「唔想過去嘅新聞影響我嘅價值觀。我一出道就畀人話係灰姑娘，雖然屋企唔係好富裕，但都叫小康之家，我怕屋企人唔開心。因為所有追求者都係有錢嘅，啲人就以為我只理有錢人。人與人之間相遇、相愛要睇緣分，我係重感覺嘅人，如果感情唔啱，條件再好都唔OK。入行時都有唔開心，但依家學識睇開啲。」問到有何擇偶條件？她表示另一半要有責任心及上進心：「家境再富裕都係屋企嘢，一夜之間可以冇晒。對女人負責任、錫女人嘅男人就吸引到我。我唔太鍾意靚仔，但鍾意高大，一望就知係老公嗰啲，好似劉青雲咁！」

談到今年的願望，她笑說：「希望觀眾唔會因為負面新聞而抹殺我嘅努力，雖然呢兩年嘅成就唔係超班，但都想求進步，得到認同！」

許亦妮又透露最想與影帝劉青雲合作：「以前睇戲唔識，但依家更加識得欣賞佢哋嘅努力同欣賞電影。同埋我想試吓同內地演員合作，王寶強係我其中一個好鍾意嘅演員。至於劇集方面，我想同劉松仁合作。（佢哋都係成熟穩重型男士？）覺得佢哋會教到我好多嘢，就算唔教我，我喺隔籬觀察都學到嘢！」

除了嘗試不同角色外，她亦希望身體健康：「要做多啲運動，原來去到呢個年紀新陳代謝真係會慢。以前唔食飯就會瘦，依家唔會。至於愛情方面，我唔會強求！」

後記：獨自出走

甫出道已有不少負面新聞的Whitney，經常笑面迎人，問到曾否為此哭泣？她說：「梗係會唔開心，入行後話冇壓力係假。雖然啲人同我講一睇報道就知係假，我亦行得正企得正，但都喊過，依家會當係磨練。」

她表示最佳的減壓方法是獨自旅行：「我試過喺去機場嗰條路喊咗出嚟，我會選擇喺唔影響他人嘅情況下發洩。加上一個人去散心自由自在，唔需要理其他人，好Refreshing，係好好嘅減壓方式。」