國際巨星周潤發寫下影壇光輝紀錄,他主演的《西遊記之大鬧天宮》及《賭城風雲》在內地創出累計約19億元票房佳績,兩片更決定邀發哥演出續集。發哥為答謝投資者與觀眾的支持,承諾「努力睇吓就唔就到」!

貴為國際巨星的發哥當然是票房保證!

周潤發主演的賀歲片《西遊記之大鬧天宮》及《賭城風雲》,截至昨日創出累計逾15億元人民幣(約19億港元)票房佳績,票房收入高達10.33億元人仔的《大鬧天宮》,更榮登史上最賣座華語電影第3位。《賭城風雲》(內地片名《澳門風雲》)雖然開畫票房只收2千4百餘萬元人仔,但上映4周累計票房已達5.02億元人仔,僅次票房冠軍《大鬧天宮》及收逾6.9億元人仔的《爸爸去哪兒》,暫列第3位,但《賭城風雲》現時單日票房及排片量,均已勝過其餘兩片,後勁愈追愈有,非常凌厲!

謙稱:關我咩事吖?

雖然發哥「自己打自己」,但在兩齣賀歲片對打下,仍能創出輝煌佳績,證明觀眾喜歡發哥,兩片更已決定乘勝追擊邀請發哥八月拍攝續集,以滿足廣大影迷。對於創出票房佳績,發哥謙稱:「關我咩事吖?最緊要係老闆開心,令投資者賺到錢,如果冇老闆肯投資,我哋食西北風咩?電影圈要多啲戲開,咁至多工作機會o架!」

貴為影壇大忙人的發哥,據知,今年度早已擬定接拍3齣電影,換言之,再接拍《大鬧天宮》及《賭城風雲》續集的機會不大,但發哥為答謝支持香港電影的投資者及觀眾,他給大家一線希望:「《大鬧天宮》主角係孫悟空,玉皇大帝喺下集應該發揮唔大,因為孫悟空都去咗取西經,睇咗劇本先,睇吓係咪用荷里活特技,努力睇吓就唔就到。(接埋《賭城風雲》續集?)我同王晶、謝霆鋒合作好開心,但咁快就再拍續集啦?會唔會急咗啲呀?我諗隔一年會好啲噃!阿晶已經約咗我食飯傾,等睇咗古仔先,睇完劇本再睇吓檔期就唔就到囉!」