出身於音樂世家、精通樂器的環球唱作女新人AGA（江海迦），除了唱得彈得，原來亦是一位愛貓之人。雖然AGA養貓年資只有一年，但愛貓飛飛已成為其密友。

每次AGA彈結他，飛飛都會乖乖坐低聽，勁有靈性！

AGA曾與關楚耀開騷，未知有否帶愛音樂的飛飛捧場？

黐身的飛飛伏在AGA的懷抱裏，勁嬌嗲！

AGA與媽咪都被飛飛迷倒，對牠錫到燶！

飛飛

於一年前開始養波斯貓飛飛的AGA，與愛貓的相遇原來有一段故事。她透露飛飛身世可憐：「其實佢有啲慘，嗰時係家姐嘅空姐朋友買咗番嚟，但因為佢個未婚夫唔鍾意貓，所以遺棄咗佢。我哋見佢咁慘，就抱咗返嚟養！」

之前從未養過貓的AGA，坦言飛飛的來臨令她對貓咪改觀：「佢好嗲o架！我本身覺得貓應該唔睬人o架嘛！」原來平日飛飛聽到AGA開門回家，便會衝出大門迎接主人，更會跳到她身上扭抱，AGA笑說：「佢細個嗰時仲嗲呀！每日都準時晨早跳上嚟，踩住我塊面叫我起身！」

寵物識聽歌

雖然AGA與飛飛只是相處了一年，但已滿載溫馨時刻。AGA甜絲絲地表示，每次放工回家吃飯時，飛飛都會靜靜地坐在對面望着她，相當乖巧。正所謂物似主人形，AGA興奮地指飛飛跟她一樣熱愛音樂：「每次我彈結他，佢就會走嚟我間房聽，仲會同我一齊睇YouTube！」

名字：飛飛

年齡：1歲

品種：波斯貓

性別：男