歌手李蕙敏（Amanda）將於4月舉行個人演唱會，是次個唱具多重意義，由主題到曲目，Amanda均想力臻完美，期望與歌迷經歷一次難忘的音樂旅程。

李蕙敏婚後踏入人生新階段，但對音樂的熱誠不減。

與外籍老公相處愉快的李蕙敏，感激對方帶給她新觀點。（資料圖片）

即將開騷的李蕙敏凡事親力親為，希望歌迷極盡視聽享受。

積極備戰個唱的Amanda透露裏裏外外已做足準備：「今次個唱主題係Forever Love（永恒的愛），除咗標誌住我結咗婚，進入人生另一個階段之外，仲想多謝支持咗我好多年嘅朋友，久唔久就會有Fans問我幾時開Show，佢哋好多喺學生時代已經聽我啲歌，依家已經係中產人士，仍然咁關心我，令我感覺好溫暖，呢次個唱想答謝佢哋。」

睇中醫備戰

而音樂對Amanda相當重要，除與Fans連繫，亦帶給她靈感：「我設計時裝都要聽住歌，唔敢想像冇咗音樂嘅世界會係點，我諗會好Sad！」

問到英籍老公Serge Micallef會否不准她穿性感歌衫，Amanda說：「佢OK，靚就得！但我唔想刻意，我已經勤力做運動，又睇中醫調理身子，想以最佳狀態示人。（婚後個唱心情緊張？）心情同未嫁前會唔同，感受會特別深，我自覺表演時可以好大膽，但其餘時間就係好Down To Earth嘅普通人，以前我太專注工作，忽略身邊事物，但外籍老公以另一種角度睇香港，令我知多咗好多。（老公睇你個唱？）應該會。（上埋台？）叫佢上台想嚇死佢咩？但佢『舞』功幾厲害，或者可以上台跳番Part！」