李思捷與王宝宝（春卷）分手後屢傳復合。但前晚春卷出席派對時當着思捷面與另一男人十指緊扣！思捷更自爆該男子是他老友！關係夠晒混亂！

春卷到場時與男友人十指緊扣，當思捷冇到！

思捷笑笑口，不介意「前度」拖仔！

春卷與男友人肉緊攬攬，風騷滿面！

佘詩曼（左）與梁靖琪一同出席派對。

雖然「舊愛」喺正面前抱抱，思捷仍笑到「四萬咁口」。

梁家樹與老婆同樣手拖手到場，非常恩愛。

李思捷與王宝宝這對「過氣情侶」自去年分手後屢傳復合，前晚11時許，兩人帶着兩名男友人現身灣仔一間酒店，出席無綫戲劇製作總監梁家樹的榮休派對，同場出席嘉賓還有英皇老闆楊受成、佘詩曼、苗僑偉夫婦、錢嘉樂夫婦及洪天明夫婦等。

春卷到場時，與同行男子十指緊扣，邊講邊笑，完全無視尾隨的思捷！看到「前女友」與男友人拖晒手，難得思捷沒有黑面，更「四萬咁口」！春卷走進酒店更與「拖手男」攬攬，男方禮尚往來，出手輕摟其腰，春卷更得戚回頭向鏡頭舉Ｖ！目睹整個過程的思捷不但沒有呷醋，反而與「拖手男」有講有笑。

舊愛嬲?唔理佢!

春卷逗留約一小時後獨自離場，問到「拖手男」身份，她說：「朋友，玩吓啫！（唔驚思捷嬲？）唔理佢啦！（你哋攬晒喎！）係朋友啫！（男朋友？）唔係，見咁多記者，玩吓啫！（思捷有冇訓話你？）冇，佢頭先都喺度！」而思捷昨日在電話訪問中表示「拖手男」是其朋友：「嗰個係喺洛杉磯識嘅朋友，佢嚟香港開會，我哋咪一齊食飯，帶埋佢去Party！（唔介意佢同春卷咁親密？）依家年代唔同喇！禮儀嚟啫！（你同春卷咩關係？）同以前一樣，Very Good Friend，總之就好Close啦！」