天后容祖兒與劉浩龍（師兄）相戀兩年，師兄在電台訪問中承認愛情令他變穩重，又大爆當年祖兒給他感覺「好寸」，而兩人的好友李克勤，昨日在微博分享祖兒的下廚照，天后即時變身「待嫁賢妻」。

劉浩龍坦言拍拖後改變了不少。

祖兒到克勤（右）家作客，更送上貴價士多啤梨品嘗。

祖兒與師兄愛得甜蜜，新年時與圈中人飯局更公開十指緊扣。昨日師兄接受電台錄音訪問，承認與祖兒相戀後改變不少，又表示要做好自己來「保護到個女人」，近年不少人覺得他與以前不同，變沉實了。

講到戀情由不被看好到現在獲外界接受及祝福，師兄說：「多謝支持，由第一日開始都冇乜點介意大家點睇，因為拍拖係兩個人嘅事，無奈我哋係藝人，佢仲係咁成功嘅藝人，但都了解個遊戲係咁，梗有上把下把，唔係點成茶餘飯後話題，呢兩年學識咗把口生喺人哋度，支持嘅咪多謝，唔支持就再做好啲。」

提到祖兒曾指師兄昔日給她的感覺很頑皮，原本聲線嚴肅的師兄即輕鬆笑說：「我都覺得佢曳！佢未唱歌時已經識佢，識咗好多年，唱歌嘅我係比較頑皮，佢見到我咁都好正常，嗰時我都覺得佢好寸喎！大家當時都唔成熟，感覺好一致。」

作客李克勤

另外，李克勤昨日在微博上載好友祖兒到其家中「玩煮飯仔」的照片，透露祖兒拿着大袋食物及食譜首度落廚炮製愛心Risotto，一煮便是八人分量，除了阿姐汪明荃，相信師兄亦是座上客。相中祖兒炒餸及切菜似模似樣，十足家庭主婦，難怪克勤勁讚她天分不只在演藝事業上。而對於祖兒送上約70元一顆的士多啤梨，克勤還笑言捨不得吃。