Bosco急彈開杏兒兜路走
無綫小生黃宗澤（Bosco）及名模楊崢自公開姊弟戀後，負面新聞層出不窮，昨晚Bosco與舊愛胡杏兒「狹路相逢」，兩人明顯勁尷尬，Bosco更急急彈開，杏兒更亦不惜兜路走，但仍大方祝福「崢澤戀」。至於飽受壓力的楊崢今日將出席時裝活動，惟表明封口拒回應戀情。
杏兒自言與Bosco碰面不感尷尬，又話冇留意「崢澤戀」，但仍衷心祝福兩人。
Bosco每當談起楊崢愈來愈低調，更再次以「畀條生路我行啦」求饒。
杏兒（箭嘴示）到場後發現Bosco正在附近接受訪問，兩人只隔數個身位。
楊崢今日將出席時裝活動，據知將封口拒談戀情。
Bosco拍着志偉膊頭，笑得甚為尷尬。
為避Bosco兜路走的杏兒，與梁家樹寒暄一番。
黃宗澤前年與拍拖七年的胡杏兒分手，本月初Bosco爆出與名模楊崢姊弟戀，更有「親嘴照」流出，其後負面新聞不斷兼傳分手，令Bosco身心疲累，杏兒則一直未有「表態」。昨晚杏兒與Bosco齊在將軍澳電視城出席戲劇製作總監梁家樹（Tommy）榮休酒會，是Bosco爆新戀情後首次碰頭，自然成為焦點！
兩人差不多同時間抵達會場，杏兒抵埗後即向記者詢問梁家樹的位置，其後發現Bosco正在附近接受訪問，她誤以為記者有意「撮合」兩人，即回頭笑說：「你哋好鬼衰o架！」為避開Bosco，她不惜兜路行另一邊，期間Bosco發現杏兒時亦瞄了兩眼，兩人只隔幾個身位，場面超尷尬！而Bosco受訪後即極速彈開，與杏兒一直保持「安全距離」。
祝福舊愛戀情
杏兒死撐再與Bosco碰面不感尷尬，但因剛從巴黎返港，未有留意「崢澤戀」，對於被指撐Bosco分手，杏兒即澄清說：「冇咁嘅事！我衷心祝福佢哋。（有傳黃母唔鍾意楊崢？）我唔方便講太多，都係人哋嘅事，希望佢哋開心啦！」過往與黃母感情頗佳的杏兒，被問到是否有聯絡？她則尷尬表示不想多談。她又表示視梁家樹為伯樂：「當時我只係小小港姐，佢搵我拍《衝上雲霄》係好大膽嘗試。」
而Bosco昨晚被問到母親是否不喜歡楊崢而鬧他？他只說：「邊有吖！你哋仲清楚過我阿媽！今日唔想功高蓋主，係嚟賀Tommy嘅，祝福佢有新工作環境。」對於負面新聞，Bosco表示每日都有不同版本，再問母親是否對楊崢印象麻麻？他說：「屋企嘢唔講喇！（分手都唔講？）等我哋自己處理啦！係兩個人嘅事，唔使樣樣事都700萬人見證。」再問是否情不變？Bosco似是求饒的說：「日日都講，你哋都攰啦！畀條生路我行啦！（同杏兒合照？）你哋真係麻煩o架啫！」最終Bosco與杏兒亦沒有合照。
另外，壓力甚大的楊崢日前向電台申請長假，今日她將出席時裝活動，據知她將封口拒談戀情。
