官恩娜昨日出席活動時不斷嘟嘴賣萌，又Cute又Sexy，但她卻自爆曾因性感厚唇而自卑，似足「Q太郎」！直到長大後才發現男生都愛厚唇，更獲歌神許冠傑當眾讚她好好錫！

Ella揸住唇膏嘟嘴賣萌，相信迷倒不少宅男。

Jason幫Ella搽唇膏搽到手震震，真係令人睇到一額汗！

歌手官恩娜（Ella）及陳智燊（Jason）昨日出席唇膏新品發布會，Jason即場幫Ella搽唇膏，未試過幫女仔搽唇膏的他全程手震，要Ella出手教路才得以順利完成。

自嘲似「Q太郎」

而擁有性感厚唇的Ella自爆曾因嘴唇厚而自卑：「細個好憎自己個嘴，以前未興咁厚嘅嘴，覺得好似Q太郎，好自卑o架！仲成日畀人笑我個鼻同嘴大，搞到我好唔開心，估唔到依家咁Hit，我仲嫌唔夠肥添呀！」她笑言長大後才發現厚唇的好處：「佢哋話厚嘴唇好錫啲，初入行做阿Sam（許冠傑）演唱會嘉賓，唱完《無敵是愛》跟住錫錫，佢當住幾萬人面前讚我個嘴好錫！」

咀彭于晏嫌「刮」

Ella又笑指咀過不少男星：「拍戲咀過彭于晏，不過當時佢箍緊牙，所以有啲刮刮哋嘅感覺。最近錫過嘅係錢嘉樂同馬國明，都係一致好評o架！」她更大爆14歲時獻出初吻的笑料：「我錫完唔敢返屋企，驚媽咪睇得出我錫過，喺屋企門口踱步踱咗半個鐘！我到依家都記得好大陣汽水味，好難受！」她又表示男友不可以食煙：「我係超級控煙辦，十呎以內有少少煙味我都聞到！」