已婚的張暖雅（Angelina）早前為冧老公胡耀輝（Mark），特地偷師學廚。雖然Mark識煮多國菜式，但要保持Fit爆身材的Angelina卻大呻：「叫我食嘢又要我減肥，好矛盾。」　

雞手鴨腳的張暖雅都係負責影靚相好啲。

張暖雅笑言將煮飯的責任交畀老公。　

已為人妻的張暖雅早前到齋舖向師傅偷師，不過她明顯雞手鴨腳，聽到油炸聲即嚇到彈起，場面搞笑！不過，Angelina否認廚藝唔掂，並解釋：「呢個係專業廚房，所以啲用具非常重，之前又減肥減到攞唔到。其實我識煮嘢食，但屋企冇畀呢個權力我，因為有幾次搞到好大鑊，我煮完個廚房好亂，執嘅時間仲耐過煮，阿Mark叫我唔好煮，話嘥太多時間。」她又笑言有次煲雞湯，打算將食剩的雞骨丟落馬桶，豈料塞住唔上唔落兼水浸，結果花了近五千元請水電師傅來通渠。

老公做煮飯公

問有否獲老公讚廚藝好？煮開齋菜的Angelina笑說：「佢話下次都係自己煮番，我唔認為佢覺得唔好食，只係唔啱佢胃口啫，佢識煮西餐、日本菜同意大利海鮮飯，超勁！（全部你都唔識煮？）我可以識嘅，只係將個機會畀咗佢。（好幸福？）都唔幸福，因為做娛樂圈要好瘦，要控制住唔好食太多。」