藝人車車（張紫櫻）早前情人節特地向花藝師請教插花藝術，務求在19年一遇的東西方情人節，為愛情轉轉運，車車跟花藝師Henry Leung學習製作兩盆花後，她慨嘆箇中學問殊不簡單：「對於收花，我夾夾埋埋次數唔超過5次；但插花我只識足球術語入面嗰種『插花』！不過我諗我學吓都好，或者可以令我優雅啲！」

車車跟花藝師Henry Leung學插花，都算有板有眼啦！

花藝師Henry說到車車的插花潛質：「以初學冇經驗嚟講，都勉強叫過關。其實情人節個個都送花，如果自己親手插一盆花，就會別出心裁啲！插花唔一定要上堂學，隨意憑感覺都冇話唔得，當然靚唔靚就另計啦！只不過報啲專門課程，可以了解多啲關於花嘅知識，製作花藝時亦都可以好啲控制成本。」

車車聽罷即搶白：「追女仔又點會唔使用錢呢？愛情係無價嘅，不過對於情人節，我都冇乜期望，費事失望啦！索性上堂學插花，好過等人約！」