無綫藝人王浩信及黃心穎昨日拍攝新劇，王浩信僅穿黑色背心，大晒「麒麟臂」，又喪做掌上壓，贏得「心穎BB」讚不絕口的他，更自爆老婆陳自瑤愛上他的朱古力腹肌。　

王浩信在沙灘做掌上壓，累心穎硬食揚起的沙。

心穎大讚拍檔王浩信好人。

王浩信

王浩信（Vincent）與黃心穎昨日到赤柱正灘，為新劇《再戰明天》開工，當中講述Vincent為幫「心穎BB」操練體能，於是上身除剩黑色背心，大晒「麒麟臂」，喪做掌上壓。Vincent於鏡頭前落足氣力做掌上壓，絕冇「揸流攤」，揚起的沙粒更搞到「心穎BB」成面都係。

Vincent又自爆因為老婆陳自瑤愛上了「朱古力腹肌」而要不斷操肌：「依家練到上咗癮，日日操兩個鐘，食嘢又要清淡，唔係烚蛋就係烚菜，好少出去食飯，搞到連朋友都唔會約我去飯局，可以話清淡到冇朋友。（情人節咪冇得食燭光晚餐？）老婆同我一齊食沙律，佢本來對大隻佬冇特別喜好，後來都有讚我身形好睇，我先知原來佢都好鍾意『朱古力腹肌』，令我好有動力去Keep Fit。」

讚拍檔好人

另外，心穎上月25歲生日，早前就大晒三吋事業線性感賀年，被問到是否大個女決心行性感？她說：「冇特別想行性感，我一直都係做自己，覺得舒服就OK啦！」而拍劇經驗尚淺的她又大讚Vincent好人：「Vincent好好人，一啲都唔惡。教我好多嘢。（頭先見你拍到成面沙？）為咗拍攝效果，都在所難免啦！（呻辛苦？）唔係吖，我覺得都幾搞笑、幾好玩！」心穎咁專業，相信以後會有更多拍劇的機會。